Shillong, Nailar 25: Ka Presbyterian Youth Today International Network (PYTIN) ka la pynlong ïa ka jingïaid paidbah ban pyrshah ïa ka jingdih drok na Civil Hospital Shillong shaduh ka jaka ïeng kali MUDA ha Khyndai Lad.
Haba kren ha kane ka sngi na ka liang u Bah Daniel Stone Lyngdoh u president jong ka Presbyterian Youth Today International Network bad u nongïasaid aiñ jong ka Sorkar Meghalaya hapoh ka Supreme Court jong ka ri India u la pynpaw ïa ka jingsngewkhia halor ka jinglong jingman kaba don ha kane ka jylla kaba la pynsaphriang wat sha ki jaka nongkyndong ruh.
U Bah Daniel Stone u la pynpaw ba ka long kaba donkam ïa baroh ki niam ban ïawan lang bad sngewthuh ïa ka jingeh jong ka jingdih buaid.
Ki nongïashim bynta ki la rah ïa ki placard kiba don ki jingthoh “U Drok U Pynjot Ïa ki Jingphohsniew-Jied ïa ka Jingkyrmen,” “Ka Jinglah jong phi ka kham khraw ban ïa kano kano ka jinglong ba ha khlieh,” bad “Ka jingkoit jingkhiah ka long kaba lah-Ngeit ha lade,” “Ka jingmut jingpyrkhat kaba koit ba khiah, ka jingim kaba koit ba khiah, ong em ïa ki dawai.”
Lah ban kdew ba ka kaiphod jong u snem 2019 jong ka tnad ka Sorkar Pdeng ka la pynpaw ba kumba 2.5 lak ngut ki briew ha ka jylla Meghalaya ki ïakhun pyrshah ïa ka jingdih drok.
