Ngin ym pynïasoh ha kawei ka kynhun hynrei ngin ïatreilang kum ka Liang Pyrshah: Ardent

Shillong, Lber 08: U President jong ka Voice of the People Party (VPP) ha ka sngi Balang u la pynpaw ba kumba ka VPP ka la rai ban shong ha ka Liang Pyrshah hynrei kan ym leit ban ïasnoh bad kino kino ki kynhun kiba kiwei pat ki party ba shong ha ka Liang Pyrshah kin sa pynmih hynrei kan long laitluid marwei tangba haba don ki mat kiba dei ban kyrshan kan ai jingkyrshan.
Haba ïakren bad u Mawphor u Bah Ardent u la ong ba ka party ha ka Liang Pyrshah kan ai jingkyrshan ïa kino kino ki mat kiba ba ki MLA na kiwei pat ka party ki rah haba ki dei na bynta ka jingmyntoi u paidbah ka jylla.
“Ngin ym ïasnoh bad kiwei kiwei pat ki party ban thaw ïa ka kynhun Liang Pyrshah hynrei ngin kyrshan ïa ki mat kiba ki MLA na kiwei ki party ki rah bad kumba ngi leh ha u snem 2013 mynba ngi dang don ha ka HSPDP ngin ïaid marwei biang ha kane ka kynti kaba mynta kum ka party ha Ïingdorbar,” ong u Bah Ardent.
Haba kylli ïano kum ka Liang Pyrshah kin thung nongïalam u Bah Ardent u la ong ba namar ka VPP ka don tang saw ngut ki MLA kiwei pat ki party lehse kin sa sei ïa u nongïalam Liang Pyrshah.
“Ka Congress bad TMC ki don mar san ngut ki MLA bad ka la biang ïa ki ba kin thaw kynhun ban sei ïa u Nongïalam Liang Pyrshah bad kumba nga la ong ngi ka VPP te ngin ïaid la ka jong ym ban thaw kynhun bad kiwei ki party,” u la ong.
Shuh shuh u la ong ba ka jingthung jingtohkit halor ki kam bamsap kin dei ki mat ba ka party kan rah nalor ka pule puthi, ka koit ka khiah bad kiwei ki mat kiba ka party ka la kular ïa u paidbah.