Shillong, Lber, 08: Ka jingïaksaid jong ki nongrep ban pynïaid iew ïa u synsar shabar ka jylla ka long kaba jwat bha haduh katta katta hynrei da ka jingplie lynti jong ka Hill Farmer Union (HFU) ka seng kaba peit salonsar ïa ka bha ka miat jong ki nongrep ha kane ka Jylla Meghalaya ka la plie lad ïa kiba bun ki rynsan ba ki nongrep kin dup lah ban pynïaid iew ïa ki mar rep jong ki.
Uwei u nongrep synsar ïa uba la tip kyrteng u Bah Hillarius Mukhim na ka shnong Mawshut, Bhoirymbong u la mihkhmat ïa kawei ka Farmers Producer Organisation (FPO) kaba la tip kyrteng kum ka Basuba Broom Producer Company Ltd. ban pynïaid iew ïa u synsar uba pynmih na ka thaiñ ribhoi da ki nongrep na ka thaiñ jong u.
Ha kane ka iew pyninam ïa ki marrep bad ka jingïakynduh ïa ki nongkhaii na kylleng ki jylla bapher bapher une u nongrep u pynpaw ïa ka jingsngew kyndit ba dang bun ki briew hapoh ka ri India kiba pyndonkam ïa u synsar hynrei kim tip pat ïa ka jaka nangno la pynmih ïa u synsar.
Kumta ka jingwan die jong u ïa u synsar hane ka iew pyninam kaba la tip kum ka Mahalaxmi Saras 2023 kaba long ha Mumbai naduh ka 8 tarik haduh 19 tarik Lber 2023, ka long kum ka jingpynithuh ba dei na ka jylla Meghalaya ba ki nongrep ki pynmih bun bha u synsar ha ka ri India.
Kane ka jingpyrshang jong ki nongrep ban ïa tylli ka dei namar ba ki shah khñiot shaba palat ka dor ha ki nongthied bad kim ju lah ruh ban bat hi ïa ka dor bad bunsien haba ki leit die ïa u mar rep ki hap ban da kylli dor na ki nongkhaii kumta ka jingïoh ka long ka bym tikna bad kumta ban pynïatylli ïa ki nongrep ki la lum lang bad pynïaid iew hi dalade ïa ki mar rep.
