Shillong, Rymphang 8 : Ka MLA jongka East Shillong Constituency kaba la dep bam smai ruh hynnin ka sngi kum ka myntri sorkar I Dr Ampareen Lyngdoh I la ïathuh ba u Myntri Rangbah ka jylla u Conrad K Sangma u la bynshet ha I haduh saw tylli ki tnad sorkar ba in peit. Kine ki long ka tnad ka rep ka riang (Agriculture), ka tnad ka koit ka khiah (Health), ka tnad Information and Public Relations bad ka tnad ba peit ïa ki aiñ (Law).
Haba kren sha ki nongthoh khubor I Dr Ampareen I la ong “ Ki long ki tnad kiba sngew tynnad bha ban shimti bad nga thrang ban shakri bha na ka bynta ki paidbah halor kine ki kam kiba la tynrong ha nga bad nga kyrmen ruh ba ngan ai ka jingshakri kaba hok bad khlem shah shilliang khmat”.
Haba pynpaw ïa ka jingsngewkhia halor ki jingeh ba ki nongthoh khubor ki ïa kynduh, I la ong kum ka Myntri jong kane ka tnad kaba peit ïa ki nongthoh khubor in bud dien na ka bynta ka penshon bad ka jaka shna ïing ia ki. “ Ngan da shim khia bha ban ïaleh katba lah ban pynurlong ia kine ki ar tylli ki mat ba donkam naka bynta ki nongthoh khubor” ong I Dr Ampareen.
Ha kaba ïadei bad ka koit ka khiah ha ka jylla, I la ong ba kane ka dei ka kabu ksiar ïa I ban peit bad shim khia halor ka koit ka khiah bad khamtam na ka bynta ki kynthei khynnah.I kyrmen skhem ba kane ka dei kawei na ki bynta ba in pyrshang ban trei shitom bha na ka bynta ki paidbah.
In kham shim khia ban pynduna ka jingiap ki khyllung ne ki kmie ha ka por pun por kha bad thaw ruh ïa ki lad kumno ban pynbiang ïa ki jaka sumar na ka bynta ki kynthei khamtam eh sha ki thaiñ nongkyndong.
I la ong “ Nga kwah ruh ban phai khmat bha ruh sha ka jingsumar ïa kiba pang bampong ( cancer) ha ka jylla. Namar kane ka jingpang ka la jur bha mynta ha kane ka jylla Meghalaya.Yn ïaleh katba lah ban thaw ki lad ban pynduna ïa kane ka jingpang ruh bad khamtam lei lei ban pynbiang ïa ki jaka sumar na ka bynta kane ka jait jingpang ruh”.
Kiwei kiwei ki thong ki long kum ka MHIS bad ka Prime Minister’s Health Schemme namar ha kine ki bynta ruh ki paidbah ki mad bha ïa ki jingeh bapher bapher.
Halor ka rep ka riang, I la ong ba kane ka dei ka sien ba nyngkong ba la pynkhamti ha I ïa kane ka tnad kumta in shim khia bha namar ka jylla ka dei kaba dang bun kiba rep ba riang bad i thrang ban ïarap bad kyntiew ïa ki nongrep ha baroh ki liang. In shim ïa kane ka lyngkor da ka thong ban ai ka jingshakri hok ïa ki paid nongrep bad ba ki dei ban ïoh ïa baroh ki skhim bad ki jingmyntoi ba ka sorkar ka la buh bhah buh ryntih na ka bynta jongki.
