Bym don ba aireng, yn jop suk u Thomas Sangma ïa ka shuki Lamphang ka ïingdorbar Thawaiñ ka Jylla

Shillong, Lber, 08: Ka jing bym sei kyrtong da ka Liang Pyrshah ka plie lad mynta ïa u kyrtong ba sei da ka Meghalaya Democratic Alliance 2.0, u Thomas A Sangma ban jop suk ïa ka shuki Lamphang jong ka Iing Dorbar Thawaiñ ka jylla.
Haba pyntikna ba ka Liang Pyrshah ka khlem sei kyrtong ban ïakhun ïa katei ka shuki, u Nongïalam ki MLA Congress, Bah Ronnie . Lyngdoh ba dei ruh u MLA ka Mylliem u la ong, “Ngi khmih lynti ba u Lamphang u dei ban long uba long pdeng ïa baroh ki dkhot, ban ai lad lang ïa baroh khlem shah liang bad ei na kata ka daw ngi khlem pynieng kyrtong.” Ka elekshon ban jied ïa u Lamphang ba thymmai jong ka Iing Dorbar Thawaiñ ka jylla kan long mynta ka sngi Palei, ka 09tarik.
Katkum ka jingïathuh jong u Bah Ronnie, kane kam dei shuh ka sien kaba nyngkong ba u Lamphang un jop suk ïa ka shuki hynrei kum kine ki la dep ban jia teng ruh ha ki snem ba la dep. “Ha ka por jong u Bah Charles Pyngrope kumjuh ha ka por jong u AT Mondal, kitei ruh ki la jop suk ïa ka shuki Lamphang,” u la ong.
Lah ban kdew hangne ba u Thomas A Sangma u dei u MLA na North Tura bad ha ka samoi ba la dep u la bat ruh kum u Chief Adviser jong u Myntri Rangbah Conrad K Sangma.
Na ka liang utei u MLA haba kren hadien ba la dep ban thep kyrteng ha ophis treikam jong u Commissioner and Secretary ka Assembly, Bah Andrew Simon ha kane ka sngi Baar u la pynpaw lypa ïa ka jingkyrmen ba un shah jied kum u Lamphang jong ka Iing Dorbar Thawaiñ ka jylla.
Ban shu pynkynmaw, ka MDA 2.0 ka don ïa ka jingkyrshan jong ki 45 ngut ki MLA, kata 26ngut na ka NPP, 11ngut na ka UDP, mar arngut na ka BJP, PDF, HSPDP bad MLA shimet. Katba ka Liang Pyrshah pat ka don 14 ngut ba kynthup mar san ngut na ka Congress bad TMC bad sawngut na ka VPP.