Ngin ym kynran dien ban dawa na ka Sorkar Jylla ïa ki mat ba ka Save Hynñiewtrep Mission ka la buh

Nongstoiñ, Naiwieng, 17: Ka Save Hynñiewtrep Mission ka dei ka kynhun ba la ïatreilang da bun tylli ki sengbhalang kiba treikam hapoh ka jylla, ka don haduh khyndai tylli ki mat ba katei ka kynhun ka la dawa na ka sorkar MDA na ka por sha ka por ba kan pynurlong noh.
Ïa kitei ki mat jingdawa katei ka kynhun ka la pynsngew lyngba ki jingïaid proseshon ha Shillong bad ha kiwei pat ki bynta jong ka jylla kat shaba ki heh sorkar ki leit. Nalor kata katei ka kynhun, mynta ka sngi ka 17 tarik Naiwieng ka la leit ban ap ïa u bah Prestone Tynsong symbud Myntri Rangbah ka jylla ha ka por ba u wan sha Nongstoiñ ban plie ïa u maw nongrim, na ka bynta ban pyntrei ïa ki surok hapoh sor Nongstoiñ bad ïa u maw nongrim jong ka Inspection Bungalow kaba la dep tei ha Upper New Nongstoiñ.
Katei ka kynhun ka la leit ban ap ïa u bah Prestone Tynsong ha Sohpian bad ha shuwa ba un poi ki la ïeng ha u laiñ harud surok, ryngkat ki lama, ki banner bad ki placard kiba la thoh ïa ki mat jingdawa bad pyrta ban pynsgew ha u symbud Myntri Rangbah. Wat la ki dkhot jong katei ka kynhun ki la ïeng laiñ bad pyrta ïa ki mat jingdawa, hynrei u symbud Myntri Rangbah um shym la patiaw hynrei ka kali jong u bad kiwei pat ki pulit kiba synran ki la suh beit wut wut sha Nongstoiñ.
Ha kaba ïadei bad katei ka jingdawa jong ka kynhun, u bah Willstone Sohshang nongïalam ka Hynñiewtrep National Awakening Movement, haba ai jingkren ha ki lad pathai khubor, u la ong ba ka kynhun ka la dawa man ka por ba ka sorkar kan pynurlong noh ïa kitei ki mat jingdawa, hynrei haduh mynta kam pat lah ban pynlong kam wat kawei ruh. U la ong ruh ba kum ka kynhun kim banse ban mih sha madan na ka por sha ka por ban pynsngew bad ban dawa na ka sorkar ba ka dei ban pyntreikam noh mardor.
U la ong ruh ba ha kaba ïadei bad ka jingdawa jong ka kynhun ban pyntrei kam ïa kitei ki mat jingdawa, ka sorkar MDA ka la pass ruh da ka resolution ha Ïingdorbar Thawaiñ jong ka jylla, hynrei katei ka resolution kam shym la poi sha ei sha ei ruh. Ha kajuh ka por u la ong ba katba ka sorkar kam pat lah ban pyntreikam ïa ki mat jingdawa ka kynhun kan ym shong thait, namar ba ka thong ba ka kynhun ka la buh ka dei ka complete mission. U la ong ba ha man la ki por ba ka kynhun ka mih madan ban pynsngew ïa ki mat jingdawa, ka sorkar ka ju pyndonkam da ki pulit ban khang lad, hynrei wat la katta ruh ka kynhun kan ym kynran dien kat ba ym pat ïoh ïa ki jingdawa.