Nongstoiñ, Naiwieng, 17: Na ka bynta ban pynsuk ïa ki paitbah nongshong shnong hapoh sor Nong-stoiñ, mynta ka sngi u bah Prestone Tynsong symbud Myntri Rangbah ka jylla, u la hiar sha Nongstoiñ ban plie ïa ki ar tylli ki maw nongrim, uwei na ka bynta ban shna ïa ki surok ha sor Nongstoiñ kiba la mang haduh 29 klur tyngka tam. Uwei pat u maw nongrim na ka bynta ka jingplie ïa ka Inspection Bungalow lane ka guest house jong ka PWD kaba la dep tei ha Upper New Nongstoiñ.
Ha katei ka sngi la pynlong ïa ka jingïalang plie ïa kitei ki maw nongrim ha phyllaw jong ka ophis PWD, ha kaba la ïadon ryngkat da u bah Macmilan Byrsat MLA ka Nongstoiñ, bah Gigur Myrthong MLA Mawshynrut, ki heh sorkar naduh u Chief Engineer ka PWD, u Deputy Commis-sioner ka West Khasi Hills, u Engineer ka PWD Nong-stoiñ Division, u Paiem Phyllasing Syiem u Syiem ka hima Nongstoiñ, ki heh pulit ka District bad ki paitbah. Ha kane ka sngi shuwa ban plie ïa ki maw nongrim, la ïoh ïa ka jingkren na u Chief Engineer ka PWD, u bah Gigur Myrthong, u Bah Macmillan Byrsat bad khatduh eh la ïoh ïa ka jingkren na u bah Prestone Tynsong u ba long u kongsan ha katei ka sngi.
U Symbud Myntri Rangbah ha shuwa ban ai jingkren u la plie ïa kitei ki maw nongrim bad pyllait paitbah ïa ka Mahindra pickup, kaba la ai da u MLA ka Nongstoiñ sha ka Town Committee, na ka bynta ban pyndonkam ha kaba kit ñiut bad u la aiti ruh ïa u shabi jong katei ka kali sha u Deputy Commissioner ka West Khasi Hills ba un sa leh ïa kaba donkam.
Hadien ba la plie ïa kitei ki maw nongrim u bah Prestone u la ai jingkren ha kaba u la ong ba ha kine ki san snem duna ka sor Nongstoiñ ka la kylla bun shah, namar ka sorkar ka la phai khmat bad ka la leh shibun ki kam na ka bynta ki paitbah nongshong shnong. U la ong ruh ba ka sorkar NPP ka la lah ban pynlut haduh khatphra hajar klur tyngka tang na ka bynta ki surok hapoh ka jylla.
U la ong ruh ba ka jingwan jong u ha Nongstoiñ kam dei na ka bynta ban pynbiej election ïa ki paitbah, hynrei ban pynshai ba ka sorkar NPP ka don ïa ka thong ba lada kan ïoh ban synshar biang ha u 2023 haduh 2028, ka thong ka long ban wanrah jingmyntoi sha ki paitbah ha baroh ki liang bad ki jingmyntoi ka ka sorkar kan wanrah kin long ar haduh lai shah ban ïa kaba ka wan rah mynta. U la kyntu ïa ki paitbah ba kin ïatreilang bad ka PWD bad kin ai kylluid ïa ki jaka ban shna ïa ki surok khnang ba ki jingtrei kin dep kloi.
