Ngin pynrung ïa ka jingdawa ILP, Article 371 ha ka manifesto hynrei ngim don jingthmu ban dawa jylla thymmai: Ardent

Shillomg, K’lyngkot 22: U President jong ka Voice of the People Party (VPP) u Bah Ardent M Basaïawmoit u la ong ba ka party kan buh ïa ka jingdawa ILP, Article 371 kum ka mat kaba kongsan ha ka manifesto.
Haba kren sha ki lad pathai khubor u Bah Ardent u la ong ba ka jingbym ïoh ïa ka ILP ha ka jylla ka dei namar ka don lupa ka jingleh arsap ka sorkar jylla ha kaba ïadei bad ka jingdawa ILP jong ka, “bad i kumba ka la don ka jingïasuhbuit hapdeng ka sorkar jylla bad ka sorkar pdeng halor ka ILP. Nga ïohi ba ka don kaei kaei kaba ha lyndet halor ka ILP bad ba i ruh kumba don ka jingïapynbeit lupa bad ka sorkar pdeng ba ka sorkar jylla kan thet kti beit halor ka jingdawa ILP hynrei ban pynkit pap sha ka sorkar pdeng,” u la ong.
U Bah Ardent u la ong ruh, “Lada ngi wan ha ka bor ka rukom ïakhun jong ngi ban pynïoh ILP kan pher na ka rukom leh ka sorkar na ka liang ka VPP kaba nyngkong tam eh kaba ngin leh ban pynïoh ILP ka long ban ban ïakhun ïa ka hukum jong u President kaba la pynmih ha ka 11 tarik Nohprah 2019 ha kaba ka sorkar pdeng lyngba ka hukum jong u President la weng noh na ka thup jong ka jingtreikam ka ILP (Preamble) ïa ka kyntien Khasi and Jaintia Hills District ha ka aiñ Bengal Eastern Frontier Regularation Act 1873 ban bsut pat da ka jylla Manipur. Kane ka jingweng ka sorkar pdeng lyngba ka hukum u President ha ka jingshisha ka long kaba be-aiñ namar katkum ka Article 372 ka ong ba ki aiñ kiba la don lupa naduh shuwa ban wan ka Riti Synshar ym lah ban pynkylla tang da ka hukum u President hadien lai snem ba ka Riti Synshar ka la treikam ha ka ri.” u la ong.
U la ong ruh ba ka jingbym ong eiei ka sorkar hadien ba ka sorkar pdeng ka weng noh ïa ka ktien Khasi bad Jaintia na ka thup ka jinglah ban pyntreikam ïa ka ILP kan kham pynjwat ïa ka jingdawa ban ïoh ILP bad ong ba ka lynti ka dei beit ban pyndam noh ïa katei ka hukum u President.
U la ong ruh ba ka jingdawa ba ka jylla kan hap ha ka Aricle 371 ka ri India kaba mynba u dang don ha ka HSPDP ruh u kren bha yn pynrung namar kane kane ka dei ka stieh ban ïada ïa ka hok longtrai ki trai muluk ïa ka khyndew ka shyïap bad ba ki aiñ ka sorkar India kin ym lah ban treikam khlem da ïoh jingmynjur na ka assembly.
Haba kylli pat halor ka jingdawa Khasi Jaintia kaba kum ka party kaba u don mynshuwa kan ïoh jaka ne em ha ka manifesto ka VPP u Bah Ardent u la ong, “Mynba nga don ha ka HSPDP wat la ka dei ka psrty kaba kren bha halor ka jingdonkam ïa ka Khasi Jaintia hynrei lada phi peit bha ba kum ka party ha kato ka por ngim da khohreh ban dawa jylla bad kumba long mynta ha ka VPP ngin ym pynrung satia ïa kane ka mat namar gim ngeit ba ki jingeh kiba mih ha ka jylla yn lah ban weng tang da kaba phiah jylla hynrei kum ka VPP ngi ngeit ba ki don da kiwei pat ki lynti halor ka jingdon lang ki ar jaidbynriew ha ka jylla Meghalaya.”
Haba kylli halor ka Reservation Policy u Bah Ardent u la ong ba ka party kam shu kwah ban bam jakhluit ïa kane ka mat. “Lada ki paidbah ka jylla ki ai bor ha ngi ban bat ïa u lakam ba ngin peit biang ïa Reservation Policy bad ngi kular ban thung da ka Expert Committee ban pule bniah ïa ka,” u la ong.