Haduh u snem 2028 ailad ka Ïingbishar ïa ki nonghikai ban pyndep ïa ka TET, khreh kot bha kyrpad ka MSSASA

Shillong, Jymmang 31: Ka Meghalaya SSA Schools Association (MSSASA), Central Body ka la pynpaw ïa ka jingsngew kmen ba hadien ba ka Supreme court ka ri ka la ai lad ïa ki nonghikai ban pyndep thoh ïa ka exam Teachers Eligibility Test (TET) haduh u snem 2028 bad ka la wan lyngba ka jingleit jong ka Seng bad kumjuh ruh kiwei pat Association sha ka Supreme court ban kyrpad bishar biang ne ka Review Petition kaba iadei bad ka TET ïa kaba ka Association ka la file hapoh Supreme Court ba kan pynjlan na ka 2 snem sha ka 3 snem, kata haduh u snem 2028.
Haba kren sha ki lad pathai khubor ha ka sngi Saitjaiñ u President ka MSSASA u Babu Aristotle C Rymbai u la kyntu ïa baroh ki nonghikai ban khreh kot bha ban pyndonkam ïa baroh ki guide Book ba ïoh na ïew bad kumjuh ruh kiba la pynkhreh da ka Sorkar khnang ba kin long kiba bit ban long ki nonghikai bad pyndep ïa kane ka exam.
Shuh shuh haba kren sha ki lad pathai khubor u President ka MSSASA, u Babu Aristotle Rymbai ba kane ka jingkyrpad bishar biang kadei halor ka jingshim bishar kaba mynshwa kaba dei ha ka 1 tarik u Nailur, 2025.
U Babu Rymbai u la ong ba kane ka review petition ka la long kongsan naba bun na ki seng ki nonghikai ki la pynpaw ki jingsngewkhia ha ka ri baroh kawei ha kaba ki la don palat 65 tylli tam ki seng nonghikai kiba phah lang ïa kane ka jingkyrpad kaba ki la phah sha ka Supreme Court ha ka 24 tarik u bnai Risaw, 2025. Hadien ki artylli ki jingshim bishar kaba ha ka 13 bad 29 tarik u Jymmang, 2026, ka Ïingbishar ka la pynmih ïa ka hukum.