Na dukan sha ha Smit, sdang u Myntri Rangbah ka jylla ïa ka program ‘Live With Conrad’ ha sla Facebook

Shillong, Jymmang 31: U Myntri Rangbah ka jylla u Conrad K Sangma ha ka sngi Saitjain u la sdang ïa kawei ka programme kaba u la ai kyrteng ‘Live With Conrad’ kaba leh ha Facebook bad ïa kane un leh man la u bnai ha ka sngi Saitjain jong ka taiew ba khatduh, bad ïa kane u Myntri Rangbah u la sdang napoh ka shnong Smit, kawei na ki shnong ba itynnad jong ka Meghalaya na ka bynta ka kolshor bad ka jingdon ki jaka jngohkai pyrthei ba khring bha ïa ki briew.
Ha kane ka sngi ïa u Conrad K Sangma la synran lang da u Bah Lambor Malniang uba dei u MLA bad MDC barim jong ka Nongkrem Constituency nalor kiwei kiwei pat.
Kane ka jingleit jngoh u Myntri Rangbah ka pyni ïa ka buit trei kam kaba pher na kiwei pat da kaba pyniasoh ïa kane ka Live With Conrad ha ryngkat bad ka kam jngohkai pyrthei, ka kam seng kam seng jam, ka jingpynroi ïa ki sap bad ka jingïashim bynta lang jong ki paidbah.
Ha ka jingleit sha Smit ban leh ïa ka Live With Conrad u Myntri Rangbah u la shim ïa ka kam jngohkai pyrthei kum ka phang pdeng na ka bynta ban kyntiew ka kam jngohkai pyrthhei ha kane ka dong ka thain.
Mar ïa poi sha Smit u Conrad, u la ioh lad ban kynduh ïa ki paidbah bad u la rung ruh shapoh kawei ka dukan sha kaba ki paidbah ki ju rung ju mih ban dihsha bad bam ruh ïa ki jingbam tynrai kum u Putharo, doh syiar, dohjem sniang bad phylliew jingmut ruh bad ki trau dukan.
Ha kane ka jingleit sha Smit, u Myntri Rangbah ula pynlut por ban ïakren bad ki nongshongshnong, ki nongshangkai bad ki nongsengkam trai shnong ha ka Iew shnong, kynthup ïa ki trai ka RC Homestay.Hadien ula leit jngoh ïa ka Homestay bad ïakren bad ki trai Iing halor ka jingshem jong ki, ki jingeh bad ki jingangnud.
Shuh shuh na ka liang u Conrad u la leit ruh ban ïa kynduh sa ïa u Paiem jong ka Hima Khyrim u Dr Balajied Sing Syiem ha ryngkat bad ki khun ki kti bad ki paidbah kiba la ap hapoh ka madan shad.
Haba ïa kren bad u Mawphor, u Conrad K Sangma u la ong, Nga wan hangne namar ba nga la sdang ïa kawei ka programme kaba la tip kum ka ‘Live With Conrad’ ha Facebook bad nga la rai ba man la u bnai ngan leh live bad mynta u bnai nga la rai ban dei halor ka tnad jngohkai pyrthei bad nga sdang ïa kane na ka shnong Smit.
“Kane kan long man ka sngi Saitjain jong ka taiew ba khatduh jong u bnai bad ha une u bnai ban wan ngan shim pat sad a kawei ka phang bad ngan leit pat sa ha kiwei de ki jaka ban leh live ha Facrbook” ong u Conrad.
Shuh shuh u la ong kum shi bynta jong kane ka program, “Nga sngew ba ka long kaba donkam ba ngan kynduh ïa u khlieh nongsynshar jong ka Hima Khyrim bad ban ai burom ïa u bad ruh ban kynduh ïa ki paidbah ka ban long ruh kum ka CM Connect Program bad ha kane ka sngi nga dap shisha da ka jingkmen”.
U Conrad u la ong, Ka long kaei kaei kaba dap da ka jingkmen bad ngi la rai ruh ban leh ïa ki kam pynroi hapoh kane ka shnong ba kynthup naduh ki street light, ki jaka pynlang niut, bad kumjuh ruh na ka bynta ka jingshngain ka shnong ka thaw ba ngin buh ki kor CCTV bad kine kidei ki mat kiba ngi la ïa kren bad u Sordar ryngkat bad u Paiem bad nga kyrshan ïa kane ban pynurlong.
Na ka liang u Bah Lambor Malniang u la ong ba u iohi ba kadei ka sien ba nyngkong ha ka jingiaid lynti ka jong nga ha kane ka kam sain hima sima ba u myntri rangbah un wan ym duna shuh ïa ka hynriew sien hapoh ka Nongkrem Constituency bad ka jingwan jong u kam shym la dei tang ka jingwan kumto hynrei u wan ban jngoh ban peit ia ka bit ka biang jong ka shnong ka thaw.
Ha kane ka sngi ba u wan ha Smit ka long ban sngap ïa ka jingud jingnam jong ki paidbah nongshong shnong ki pynsngew bad ban sngap ruh ba kaei ka dorbar shnong ka don ban pynsngew bad ban sngap ruh ba kaei u Syiem ba don burom u don ban pynsngew bad ngi la ïoh ban ïa kren ia kiba bun ki bynta, u la ong.
Shuh shuh u la ong ruh ba ngi la ïa kren halor ka khuid ka suba jong ka shnong ka shnong Smit bad ruh ban pynbha bad pynitynnad ban weng ia ki jaboh jabain kiba don ha sawdong jong kane ka shnong ka thaw, namar ba ka shnong Smit kala dei kadei ka jaka pdeng kaba ngi iohi ba ki tourist ki tuis bha sha kane ka dong ka thain.
Kum u nongialam kadei ka kamram jong nga haba don ki jingduna ban pynsngew bad ban tied ia ka jingkhang jong ki heh jong ka sorkar bad dei na kata ka daw mynta ka sngi la ioh ban rung hapoh iew hapoh haat bad u myntri rangbah ba nyngkong ba ngan iohi ban un rung ha ki dukan ban ia dih sha lang bad ruh ban bam ïa ki jingbam ba kato ka dukan ka ai sha ki paidbah bad ngi khmih lynti ba ha kine ki khyndiat sngi ka shnong kan ioh ki jingmyntoi ba ki angnud, ong u Bah Lambor.