Ka jingpynap shrip ne jingkyntiew: Ki jingkular ka TMC lyngba ki Card ka buh jingma ïa ka jylla: NPP

By Mawphor News Desk On Jan 23, 2023

Shillong, Kyllalyngkot 22 : Ka National Peoples Party (NPP) ka la pynpaw hato ka jingkular ka TMC ïa ka WE Card ïa ki longkmie bad MYE Card ïa ki khun samla bym ioh kam ka dei ka jingpynap shrip ïa ka jylla ne ka jingthmu shisha ban kyntiew ïa ka jylla? Namar na ka liang u Myntri Rangbah ka jylla uba dei u National President ka NPP u Conrad K Sangma dang shen u la ong ba kane ka WE Card ka dei ka Lakshmir Bhandar scheme jongka West Bengal bad katei ka jylla ka la dap ram mynta na ka daw jong kane ka skhim.
U Myntri Rangbah u la ong ba ka jingdap ram jongka jylla West Bengal ka la kiew na u snem sha u snem bad ka daw bah ka dei na kine ki skhim transfer pisa jongka sorkar TMC.
“Ka jingkular ban siew 1000 tyngka shibnai sha ki longkmie kaba mut 12000 tyngka shisnem. Ki don 7 lak ngut ki longkmie kaba mut ha ka shisnem hap ban siew 840 klur. Na ka bynta ki samla bym ioh kam hapdeng ka rta 21 haduh 40 snem ruh la kular hi kumjuh kata 1000 tyngka shibnai bad shisnem ka long 12000 tyngka, Ki don 11 lak ngut ki samla kiba ha katei ka rta bad lada 50 % na ki ki bym pat ïoh kam ka la kot sha ka 700 klur tyngka shisnem. Baroh ar ki skhim kan kot beit sha ka 1500 klur tyngka bad kane ka long mar shiteng na ki skhim pynroi ha ka jylla”, ong u ong pathai khubor ka NPP u Marcuise M Marak.
Kumta u la ong kane ka paw shai ba kine ki jingkular ki long tang ki jingpynbieij election ïaki paidbah .U la ong ka TMC ka la dei ban wad bniah bha shwa ban kular namar ki la kam ba ki la lah ban pyntreikam hok ha West Bengal. U la ong ha Bengal ka jingmang ïa kane ka skhim ka long 13,000 klur tyngka kaba ai jingmyntoi tang ïaki 1.6 klur ki longkmie katba kat kum ka jingbatai ki Liang Pyrshah ki la ong ba ka Myntri Rangbah katei ka jylla ka la pynkheiñ ïa ki kular namar kiba ïoh ki long tang 1.6 klur katba ki long kmie kiba dei ban ïoh ki long 5 klur ngut.
U la kynnoh ba ka jingpynrung kyrteng ban ïoh ïa katei ka skhim ha katei ka jylla ruh ka long tang kito kiba pynrung da ki nongïalam ka party ym dei kiba leh da ki bor synshar ne da ki BDO namar ym shym la leh ïaka online registration ruh. La kynnoh ruh ba bun ki MLA ka TMC ha katei ka jylla ruh ki ud bha mynta namar kim lah ban pynhun ïa ki nongbud jongki kumba la kular.
La kynnoh shuh shuh ba ka sorkar West Bengal ka la dap ram bha namar na ka 19,500 klur ka jingduna pisa ha u 2012-11 ka la kiew sha ka 53.431 klur tyngka ha u 2021-22 bad kane ka long ha ka jingsynshar ka TMC ïa katei ka jylla.
U la ong lada ka jylla Meghalaya ka shim ram ruh 90 % ka dei kum ka Grant na ka sorkar pdeng bad ka rukom pyntreikam ruh ka long kaba pyrkhing bha namar la bud dien beit da ki Bank ne ki tnad ba shim ram. Kumta ban shim ram ruh hap ban ïoh ka jingmynjur ka sorkar pdeng.
U Marcuise M Marak u la kynnoh ruh ba ka sorkar hapoh ka jingïalam u Dr Mukul Sangma naduh 2010-2018 kiba bun ki kam ki dei beit na ka M-LAMP projek. Ka IFAD kaba bei tyngka ïaka jylla ka la jan khang ïa ki projek jongka ha u 2018 namar ba khlem pyndonkam ïa ka fund hynrei mynta ki projek ki la ïaid bha shakhmat. Ka sorkar MDA hapoh ka jingïalam ka NPP ka la lah ban khring ïa ki nong wan beit tyngka na na shabar ba la kot palat 10,000 klur tyngka bad kaba bun na kane ka dei ka grant katba ha u 2018 la lah ban khring tang kumba 2,300 klur tyngka. Kumta u la ong kumno ka TMC ne u Dr Mukul un pynshai bad pynshisha halor kine ki card ba ki la kular ban ym buh ïa ka jylla ha ka jingma.
Wat u Myntri Rangbah u Conrad K Sangma ruh ula ong ba lada pyntreikam ïa kitei ki skhim ka jylla kan ngat ha ka shrip jong ka jingdap ram kumba la jia ïa ka West Bengal.