Nongpoh, Nailar, 13: Ka Hynniew-trep Achik National Movement (HANM) Ri-Bhoi District kum shi bynta ban dang pynkhlain ïa ka jingshakri mynta ka sngi ka la lah ban dang pynïar ïa ka jingshakri, ha kaba palat 30 ngut ki dkhot ba thymmai ki la wan ban pynïasoh sha ka seng na ka bynta ban ai kata ka jingshakri ïa ki paidbah ka them Ri Bhoi.
Ïa kine ki nongïalam ba thymmai kiba la wan ban pynïasoh sha ka seng HANM, Ri Bhoi District la pdïang burom da u President ka HANM Ri Bhoi District, u Bah Donroy Kshïar ha ka jingïalang kaba la long mynta ka sngi ha Palm Hotel Nongpoh haka jingdon lang u Assistant Secretary u Bah Wanteibor Makri lem bad ka jingdon lang kiwei kiwei ki nongïalam bad ki dkhot ka District.
Haba ai jingkren ha kane ka sngi, u President ka HANM Ri Bhoi, u bah Donroy Kshiar, u la ai khublei kyrpang ïa kine ki samla kiba la wan ban pynïasoh sha ka seng bad kum ka seng ka sngewkmen ruh ba kat dang mih ki sngi la sakhi ba ki samla ki kloi ban wan pynïasoh sha ka seng na ka bynta ban shakri khambha ïa ki paidbah ka dong Ri Bhoi.
U la ong ruh ha ka jingshakri ki lah ban mih ki kynrum ki kynram kiba long ka jingpynduh mynsiem ïa ki nongïalam, hynrei kum ki nongïalam kim dei ban duh mynsiem namar haba ngi trei ne shakri ïa kano kano ka kam ki don beit ki diengpyngkiang kiba kah bad ngi dei ban ïa khun pyrshah na ka bynta ka lawei ka jaid bynriew.
Shuh shuh, u la bynrap ruh da kaba ong, ba kane ka dei tang ka jingsdang jong ka seng ban pynkhlain ïa ka jingshakri da ka jingwan ïa trei lang ki khun samla ka District bad u kyrmen skhem ruh ba da ka jingïatrei lang kin lah ban leh shibun ki kam kiba bha tam kiba long ka jingmyntoi na ka bynta u paidbah ka dong Ri Bhoi.
