Ngim sngew ïahap ïaka rukom treikam u President bad ngim pat kwah ban thad madan ïa mynta, ong ki nongïalam
Da ka jingsngewrem, khylliap lama syndon ka seng HANM ha Western Ri-Bhoi
Nongpoh, Jymmang 05: Ki nongïalam ba hakhmat lem bad ki dkhot ka seng Hynniewtrep Achik National Movement (HANM) Western Ri Bhoi da ka jingsngewrem bad da kawei ka rai kila khylliap lama syndon ïaka seng HANM haka thaiñ Western Ri-Bhoi namar ka jingbym sngew ïahap ïaka rukom treikam jong u President ba rangbah, u Bah Lamphrang Kharbani.
Kitei ki nongïalam ka seng HANM Western Ri-Bhoi kiba la rai ban mih bad khylliap lama noh ïaka seng haka thaiñ Western Ri-Bhoi ki kynthup naduh u Bah Sumar Lyngdoh President ka HANM Western Ri-Bhoi ba dei ruh u Vice President ka HANM Ri Bhoi District, u Bah Prishon Makri Vice President, u Bah Anthony Sankli General Secretary, Bah Upsait Rani Assistant General Secretary, Bah Phrangsngi Lyngdoh Joint Secretary, Bah Banshan Sohkhwai Education Secretary, Bah Wanshan Rani Sports Secretary, u Sonday Sangma Chief Organising Secretary, Bah Rony Makri Organising Secretary, Bah Plomstar Mawblei Publicity Secretary lem bad 23 ngut kiwei de ki dkhot.
Haba phah ïaka kyrwoh bad ioh ïakren ruh bad u President ka seng u Bah Sumar Lyngdoh u la ïathuh ba naka liang jong ki kim don daw eiei bad ka seng, hynrei ka jingmih jong ki bad ka jingshim rai ban khylliap lama syndon ka dei namar ka jingbym sngew ïahap ïaka rukom treikam jong u Bah Lamphrang Kharbani kum u President ba rangbah.
Halor ka jingmih noh jong ki bad ka rai kaba kila shim naka liang u Bah Sumar Lyngdoh u la ong ba ïa mynta kim pat kwah ban thad madan ïaki kam ba u President ba rangbah u leh, namar ka kan long ka jinglehraiñ ïaka iing ka sem jong ka HANM baroh kawei.
U la ïathuh ruh ba watla ki don ki kynrum kynran bad ki kam iing jong ka seng kiba la thmu ban ïakren sngewthuh bad ban pynbeit hynrei utei u President um shym la sngap satia bala shu kut tang haki jingïakren, kumta da kawei ka jingmut ban ïa kaba ïathud bad ka seng kan bha ba kin mih bad khylliap lama syndon namar kim sngew lah shah shuh ban shah ïalam ha u Bah Lamphrang Kharbani bad naduh kane ka sngi naka liang jong ki, kila pyntip ba kim don bynta eiei shuh bad ka seng.