Shillong, Jymmang 15: U Symbud Myntri Rangbah ka Jylla bad National Vice President ka National Peoples Party (NPP) Bah Prestone Tynsong ula ong ba ka jingpyntreikam ïa ka Uniform Civil Code ka dei ka bym lah satia ban pdiang.
“Ban shu kren hi sngew ba ka long kaba suk (ban pyntreikam ïa ka Uniform Civil Code), hynrei ban pyntreikam ka long kaba eh” ong u Bah Prestone.
Une u Nongïalam ka NPP ula ong ba ka jingpyntreikam ïa ka Uniform Civil Code kan wanrah ïa ka jingkulmar naba ka India ka dei ka Ri kaba don bun ki jingleh tynrai bad ka niam ïa kaba ym lah satia ban shu teh lang da kawei ka aiñ.
“Ka India ka dei ka Ri jong kiba bun ki Jaidbynriew kiba ïapher wat hangne ha Meghalaya. Lada ngi ong ba baroh kin long lang noh kawei, hangne ka jingkulmar kan sa mih” ong u Bah Prestone.
U Bah Prestone ula ong ba ka NPP kaba synshar ïa ka Jylla Meghalaya kan nym pdiang satia ban pyntreikam ïa ka Uniform Civil Code ha Jylla.
“Watla ym pat shym la pynbna da ka sorkar, hynrei kaei kaba nga kwah ban ong ba na ka liang ka Sorkar lane ka Party (NPP), kin nym pdiang satia namar kin sa don shibun ki kyndon ki ban mih” ong u Bah Prestone.
Ka Uniform Civil Code ka dei ka jingtyrwa jong ka Sorkar India ban thaw bad pyntreikam ïa ki aiñ shimet jong ki Nongshongshnong, ka ban treikam kumjuh ïa baroh ki Nongshongshnong ka Ri kam pher ïa ka jingïapher niam, jinglong kynthei ne shynrang. Ïa mynta, ki aiñ shimet jong ki Jaidbynriew bapher bapher ki dei kiba pynïaid kat kum ki Kot Niam.
Kane ka Uniform Civil Code ka wan lyngba ka Article 44 jong ka Riti Synshar ka Ri kaba ong ba baroh ki Jylla ki dei ban pynthikna ba kane ka Code kan treikam ïa baroh ki Nongshongshnong jong ka Ri.
