ban ha ki 25 snem Mar shiteng ki nongialam na Sohiong ki la mih lut : kam ki heh Congress

Shillong, Jymmang 15 : Ki nongïalam ka Congress na Sohiong, ki la ai ka jingïaroh kaba khraw ïa u MLA ba mynta ka Sohiong, Bah Samlin Malngiang namar ka jinglah jong u ban pynpoi surok sha ka shnong Sohlwai, ka nongrit kaba don ha Sohiong constituency kaba la shah iehbeiñ lada ki phew phew snem mynta.
Ïa kane, kitei ki heh Congress kynthup naduh u President barim ka Sohiong Block Congress Committee Bah Phrang Kharpan kumjuh u Vice President, Bah D Nongbri ki la pynpaw ha ka jingïalang plie ïa katei ka surok ha kane ka sngi Palei ba la dep.
Ïa katei ka surok rong ba don kumba 1kilometer tam la shna ha ka jinglut kaba kot sha ka 2.80 klur tyngka lyngba ka skim Central Road Fund.
“Lada kheiñ na ka Party Congress ha Sohiong mynta kumba 50 persen ki nongïalam ki la mih lut bad ki don mynta bad u Bahdeng Samlin,” ong u Bah Phrang da pynpaw ba ka daw kaba ki nongïalam ban mih kadei namar ki ïohi ba ka rukom treikam jong u ka kham pher shibun lada nujor bad ki MLA ba rim.
Shuh shuh u la ong, “Lada nujor bad ki 25 snem kiba la leit noh ngi lyngoh shisha namar u dei u MLA uba khlaiñ bha ban wanrah ïa ka roi ka par bad ka jingdonkam ki paidbah namar ngi ïohi kylleng ki jaka u wanrah da ki klur ki kam pynroi ha ka constituency.”
Da kaba pynbna ba ki nongïalam ba hakhmat kiba la mih na ka party ki kynthup naduh ma u kum u president, nangta u Vice President, nangta u General Secretary ka Block Congress, u Bah Phrang u ong ruh ba kane hi ka pyni ba une u MLA ym tang ba u lah ban trei hynrei u lah ruh ban pynïadei wat ïa kito kiba ïaleh pyrshah ïa u ha u 2018.
Lada u nongmihkhmat jongphi u la leh bha katne, nga sngew ban kyntu ïa phi ki nong Sohlwai ba dei tang ka jingpyrto bad ka jingsngewnguh,” la bynrap shuh shuh u Bah Phrang.
Shwa kane, u Bah Nongbri u la ïathuh ba u dei uwei na ki radbah ban trei shitom na bynta u MLA barim ka Sohiong, Bah HDR Lyngdoh ha ki 25 snem ba la dep. “Ïa kane ka surok jongphi nga la wan ban ïakren bad u MLA barim hynrei ym shym la poi shaei shaei ruh. La 25snem ka por ka la leit bad ha ka por ba u dang bat kum u Myntri PWD ruh ngi la ïakren tangba ka kam kam shym la urlong,” u la ong.
Katkum ka jingïathuh jong u, katei ka thaiñ bad ki shnong ba shakhmat ki la mad shibun ki jingeh na ka daw ka jingbym don ka surok kaba biang watla kadei ka thaiñ kaba khlain bha ban pynmih ïa ki mar rep.
“Ha ka por ba u don ha ka bor lada u mon ban leh kan eh aiu ïa u, kam don jingeh ei ei. Hynrei peit mynta u Bah Samlin tang ha ki saw snem katne u la lah ban leh,” la bynrap biang utei u heh Congress.
Ha ka sngi ba plie ïa katei ka surok jan baroh ki nongshong shnong ki la mih paidbah ban sakhi lang. Katkum ka jingïathuh da ki nongshong shnong, tang shu poi ka aiom slap, kito kiba don kali ki la hap ban leit buh noh ïa ki kali jong ki sha shilliang. Ym tang katta la ïathuh ruh ba lada donkam wat ban kam sha shilliang shnong ruh la hap ban ïaid lyngba ka wah kaba mynta pat la dep ban shna bha da ka jingkieng kaba jrong.