Ngim dei ban duh ïa ka jingshanñiah haba ngi trei kum ka kynhun : Mayral Born
Hapdeng ka jingiphuh iphieng rakhe dap 3 snem ka Lamjingshai VO ha ka shnong Pahamshiken
Nongpoh, Risaw 14: Haka jingïaid lynti kaba lai snem kynthih, ka Lamjingshai Pahamshiken Village Organization kaba kdup ruh ïa ki 7 tylli ki SHG’s jong ka shnong Pahamshiken ka la ïoh ban rakhe da kaba iphuh iphieng ïa ka jingdap 3 snem haka jingïaid lynti naduh bala seng ïaka ban shakri ha katei ka shnong khamtam ban ai mynsiem ïaki longkmie ba kin ïeng hala ki jong ki kjat.
Ha Kane ka sngi kyrpang jong kine ki longkmie la wan ban sakhi da u Bah Mayralborn Syiem MLA Nongpoh kum u kongsan haka jingdon lang u Bah Balajied Ranee MDC Nongpoh, u Rangbah shnong u Bah Cyril Maring ,ki Nongkitkam jong katei ka VO ba kynthup ïaka President ka kong Theresia Makri bad ki dkhot jong kitei ki 7 tylli ki SHG kiba don ha ka shatri jong katei ka VO, bad la ioh ruh ban ot ia u cake kum ka dak ka jingkmen ïaka jingdap 3 snem jong katei ka kynhun.
U Bah Mayralborn haba kren ha katei ka jingrakhe u la kyntu ïa baroh ki dkhot jong ka VO lem bad ïaki 7 tylli ki SHGs ba kin don barabor ïaka mynsiem ïatreilang bad ban ki ai ka jingshanñiah para dkhot haba trei kum ka kynhun ban ai mynsiem bad kyntiew iwei ïa iwei.
U la ai mynsiem ruh ïaki nongïalam ka VO bad ki SHGs bapher bapher ha katei ka sngi ba kin dang lah ban trei shitrhem kham bha shuh shuh naka bynta ka jingmyntoi jong ki longkmie bad kumjuh ban wanrah ki jingkylla haka shnong ka thaw hi baroh kawei, ba kin lah ban seng ïaki kam ki jam, ban ïeng hala ki jong ki kjat bad kumjuh ban dang lah ban kner ïaki jingïarap sha kiwei pat ki para longkmie.
Shuh shuh u la pynbna ruh ba naka liang ka jong u kum u MLA u ju ai man la u snem ïaka khusnam sha ki 3 tylli ki VO kiba trei shitom bad ki ba wan sha khmat ha baroh ki kam bad kumta u la kyntu ïaki ba kin dang ïai bteng ban trei shitom shuh shuh ha ki sngi ki ba dang wan khnang ba ha kane ka snem kin ïa ïoh ïa kane ka khusnam.