Shillong, Ïaïong, 25: U Myntri ka tnat Pule Puthi ka Sorkar Jylla u Rakkam A Sangma ha ka sngi Thohdieng u la ong ba ka jingshah shoh pynmynsaw jong u nonghikai ha skulbah North Eastern Hill University (NEHU) ka long kaei kaei ka jingjia kaba sngewsih bha. U la kular ba ka aiñ kan sa leh la ka jong ka kamram.
“Ka long ka jingjia ba sngewsih namarba ka la jia ruh khamtam hapoh ka Campus jong ka skulbah bapawnam. Ai ba ka aiñ kan leh la ka jong ka kamram,” ong u Sangma ha ka jingïakren bad ki lad pathai khubor.
“Nga ladep ïakren bad u SP. Ki la shim ïa ki lad ki lynti ban pynbiang ïa ki bor pahara. Ki Pulit jong ngi ki la leh la ka kamram,” u la ong.
Katkum ka jingong jong u, kum kine ki jingjia, kim dei shuh ban dang jia ha skulbah NEHU.
