Dang shen ka Sorkar ka la ai khusnam ïa ki shnong ha Sor kiba la lah ban pynneh ïa ka jingkhuid jingsuba. Kane ka jingai khusnam ka long ban pynshlur ruh ïa kiwei kiwei ki shnong ba kin bud nuksa lem khnang ba ka shnong ka thaw kan long kaba khuid ba suba.
Kumba ka paw, ka jinglehkhuid ïa ka shnong ka thaw ka long hi tang shi sien shi snem kata naduh u bnai Risaw ter ter. Ka jingsumar ïa ki sawdong sawkun ka shnong ka thaw ka dei ban long manla ka sngi. Ki Dorbar Shnong ki ju pynmih ïa ki Adong kiba mana ban bret jaboh pathar ha ki lynti shnong bad ki surok shnong hynrei kine ki Adong ki treikam tang ha ka Signboard katba ki tin bret ñiut ki shu long tang ki jingwah kai ha ki lynti shnong namarba ki don ki briew ki bym salia ban leh khuid ïa ki sawdong sawkun.
Don ruh ki bym salia ban bret jaboh na kali ba ki shong, don kiba bret ïa ki bilor um sha kyndong kynshrot ynda ladep pyndonkam bad kaba kham isaitmet ka dei ka jingïabret pathar ïa ki bilor kiad bad ki song jingbam da ki nongdie kiad kiba ju mlen ban shongkai ha ka por mynmiet mynïong ha ki jaka badum ha surok shnong bad sha ki kyndong kynshrot.
Haba ïohi ïa kine ki jingim bym don jingsngew jong ki briew ka pynpaw ba ka jingpyrkhat ka dang duna ha ka jinglong jong ki paidbah namar katba shaba ngi phai ka jingsatah jong ki jaboh jabaiñ ka long kaba shyrkhei la ka long ha ki jaka paidbah ne ki shnong ki thaw khamtam ki surok bah National Highway.
Ki surok, ki khlaw, ki wah, ki jaka paidbah ki la kylla long ki jaka bret jaboh, namar kumba ngi la sakhi bun na ki wah, ki mariang sawdong ki dap da ki plastik bad ki bilor um kiba dei ki nognshun ba khraw tam jong ka mariang, kane baroh ka wan na ka jingbym kitkhlieh bad ka jingsngew shiliang jong u paidbah hi.
Wat ki nongleit nongwan ki ju mlien ban bret jaboh ha ki surok haba ki leit ki wan ban kawang na ki jingkhang iit bad khmih lynti ban don ki nongtam, hynrei ka khuid ka suba kam dei ka kam jong uwei ne ar ngut, ka dei ka kamlang jong baroh. Katba ym don ka jingkylla na ka jingsngew jong ka mynsiem, ngin dang sah hajuh ka rukom pyrkhat riewkhlaw, ‘Ngan pynjaboh ma nga, kin pynkhuid kiwei.’
Ka jinghikai ka dei ban sdang na ki skul, na ki longïing bad na ki shnong hi. Ka Sorkar ruh ka don bynta ban pynkhlaiñ ïa ka jingpynshai paidbah, hynrei khlem ka jingïashim bynta jong ki nongshong shnong, ka long ka jingeh ban wanrah ka jingkylla namar bunsien ngi ïohi da la ki jong ki khmat ba ki shnong ki thaw ki khuid tang ha ka sngi pynkhuid shnong, lait noh ki shnong kiba don ka jingkitkhlieh lang jong baroh, hynrei tang hadien ka jingpynkhuid la ïohi biang ba ki surok bad ki lynti ki syngkien ki dap biang da ki jaboh jabaiñ bad isaitmet ban peit.
Kam myntoi ban mai ïa ki khynnah kiba rit haba kiba la heh la san kim don ka jingkitkhlieh na lade ban wanrah ïa ka khuid ka suba kaba long kawei na ki thong jong ka Sorkar ha ka ri baroh kawei kaba la pynsaphriang ïa ka jingïalap ïa ka Swacch Bharat Abhiyan ban pynlong ïa ki shnong hapoh ka ri India kiba khuid.
Kum ki nongshong shnong jong ka Jylla Meghalaya kam myntoi ba ngin put turoi hakhmat ka pyrthei ïa ka jingkhuid jingsuba jong ka shnong Mawlynnong bad ka shnong Moolamylliang, ki shnong kiba jngai da ki phew kilomtar na Sor Shilong tangba ki tip bad ki sngewthuh ïa ka jingkordor ban sumar khuid ïa ka shnong ka thaw lada ki nongshong shnong ha ka jylla baroh kawei kim don satia ïa ka jingkitkhlieh ban ïatreilang bad ki bor synshar shnong bad ki bor sorkar.
To ngin nym ap shuh. To ngin sdang ban burom ïa ka khuid ka suba da kaba pyndonkam hok ïa ki jaka theh ñiut, pynkhuid ïa la ka shnong, bad ban ai nuksa sha kiwei. Ka khuid ka suba ka dei ka jingkitkhlieh bad ka burom u paidbah.
