Shillong, Jylliew, 25: Ka Seng Samla Phanñiewlah Rum kaba hap ha ka Hima Lyngiong, East Khasi Hills District ka la plie paidbah ïa ka signboard ba la thoh ïa ki kyrteng jong ki jaka bad ka long ruh kum shibynta ban pynpaw paidbah ïa ki jaka ba itynnad bad pynsuk ïa kiba kwah wan ïaid kjat hapoh ka thaiñ.
La plie ïa kane ka signboard da u Bah Staising Kharbteng uwei na ki riewpawkhmat ka thaiñ.
Ha ka jingkren u la pynpaw ba ka kam jngohkai pyrthei ka dei ka pliang ja ïa ki paidbah. U la kyntu ïa ki trai shnong ban long kiba don akor bad pdiang sngewbha ïa ki nongwan jngohkai khnang ba ka jingmyntoi kan long ïa ki hi.
U la khot bad wer ruh ïa ki nongwan jngohkai ban ïatreilang bad ki trai shnong da kaba ïalam ïa ki, haba leit sha ki jaka bapher bapher ban sakhi ïa ka mariang ba itynnad ha kane ka thaiñ khnang ban lait na kino kino ki jingjia bym sngewtynnad.
La ïoh ruh ïa ka jingkren na u Bah Jon Ryntathiang uba dei u Rangbah Shnong, u bah William Kharshiing, ka kong Sara Kharjumati bad la pynïaid ïa ka jingïalang da u bah Ailand Swer President ka Seng Samla Phanñiewlah Rum.
Ha kane ka jingplie paidbah la donlang ki nongshong shnong bad ki khynnah skul ka Phanñiewlah Rum Secondary School.
