Shillong, Jylliew 25: Ka Summit FA bad ka Golflink ki la khur pura ïa ki lai point hadien ba ki la jop ïala ki jong ki jingïalehkai jong ka lympung U-20 Fourth Division 2025 ba la pynïaid da ka Shillong Sports Association, kiba la long hynne ka sngi Balang ha madan First Ground-SSA Stadium, Polo. Katba ka Laitkroh bad ka Risa Colony ki la ïasam mar shi point naba ïakhaid da mar 2-2 kol.
Haba phai sha ka jingïalehkai kaba nyngkong, ka Summit FA ka la ïoh ban khur ïa ka namjop kaba nyngkong hadien ba ka la pynliem noh ïa ka Dilingiem SC da tang 1 kol. Ka jingïaroh ka long sha u Nicky Mawthoh uba la pynkhih ïa kane ka namtam ha ka minit kaba 22 kaba la biang pura ïa ka Summit FA ban khur ïa ka jingjop.
Shuwa kane ka jingïalehkai, ka Summit FA kaba la mad ïa ar tylli ki namrem ha ki jingïalehkai ba ladep ka donkam ban jop khnang ban rah ïalade na ka kyrdan ba sha trai duh jong ka Group C.
Ha ka jingïalehkai kaba ar la sakhi ïa ka Golflink kaba la kylla long ka kynhun kaba nyngkong ban pynthikna ïalade ban ïoh rung sha ka wat ïakhun kaba ar na ka Group A ha kane ka lympung U-20 Fourth Division 2025 hadien ba ka la jop da 1-0 kol ïa ka Mawshbuit.
Da kane ka Golflink mynta ka la jop ïa baroh lai tylli ki jingïalehkai jong ka bad da kaba kamai 9 poiñ ka la thikna don ha ka thup kyrdan Top 2 jong ka Group A, bad ban buh jaka ha ka wat ïakhun kaba ar. Katei ka shi kol la thep da u Ribansan Wahlang ha ka minit kaba 39.
Haba phai sha ka jingïalehkai kaba khatduh jong a Group-A, ka Laitkroh ka la pynsyrwa ïa ka kabu ban khur ïa ka namjop hadien ba ka la ïoh lamkhmat ar sien ïa ka jingïalehkai lyngba ki kol na u Bankhrawlang Myrthong (13’min) bad u Rishailang Myrthong (67’min). Hynrei ka Risa Colony ka la ïohlad ban jubab baroh ar sien ha kaba baroh ar tylli la thep da u Seiboklang Mawrie (40’+1, 73′).
Ka prokram ïalehkai ha kane ka sngi Palei ki long: Mawpdang pyrshah ïa ka Pommura, Group D, ha ka por 10:30 baje mynstep, bud sa ka Nongkohlew pyrshah ïa ka Lummawbah, Group B, ha ka por 1:30 baje mynsngi, bad khatduh ka Mawphlang pyrshah ïa ka Laitlulong, Group D, ha ka por 4:15 baje janmiet.
