Ngi lah ban pynshisha ba ka ophis u Speaker ka la ioh pdiang ia ka shithi sospon ia ki 2 ngut ki MLA : Congress

By Mawphor Editor On Aug 27, 2024

Shillong, Nailar 26 : Ka Congress kaba don ha ka Liang Pyrshah ha Iing Dorbar Thawaiñ ka jylla, ha ka sngi Nyngkong ka la ong ba ka lah ban pynshisha ba ka ophis jong u Lamphang ka iing Dorbar, ka la ïoh pdiang ïa ka shithi kaba pyntip halor ka rai jong ka party ban sospon ïa ki arngut ki MLA kata ïa u Bah Gabriel Wahlang bad u Bah Charles Marngar na ka bynta ka por kaba hynriew snem, ha shwa ba kin pynïasoh pura bad ka NPP.
Na ka liang ka party ka la byrngem ruh ba shen kin sa ujor da ka mukotduma ban pyrshah ïa ka jingleit pynïasoh jong ki lai ngut ki MLA ka Congress sha ka NPP. Kine ki lai ngut ki kynthup ïa u Bah Gabriel na Nongstoiñ, Bah Charles Marngar na Mawhati bad Dr. Celestine Lyngdoh na Umsning.
Haba kynthoh halor ka jingong jong u Speaker ba um tip ïa kane ka sospon, u heh ka Congress bad u MP barim ka Shillong u Bah Vincent H Pala u la ong, “Ha ka jingshisha ngi la phah ïa ka rai sospon bad ka ophis jong u Speaker ka la ïoh pdiang ruh ïa ka. Ngi don ka jingpynshisha ïa kata.”
U Lamphang ka Iing Dorbar Thawaiñ ka jylla, u Thomas A Sangma ha ka taiew ba la dep u la ong, “Ngam shym la ïoh hi dalade ïa ka hukum sospon (ba la pynmih da ka seng Congress) haduh mynta ka sngi. Phim lah ban khmih lynti ba ngan shim ïa ka rai katkum kaei kaba la don ha ki lad pathai khubor.”
Une u Nongïalam ka Congress u la kynnoh ba ka jingong jong u Lamphang ka dei kaba thok bad ong ruh ba ka NPP ka la thrang dik dik ban pynthikna ïa ka jingwan pynïasoh kitei ki lai ngut ki MLA ka Congress ban khanglad ïa ka jingïapait hapdeng ki MLA jong ka.
“Sa tang khyndiat ka la jan mih ka jingïa pait ha ka NPP bad dei na kane ka daw ki kwah dik dik ba ki briew jongngi kin leit ban pynïasoh noh bad ki namar ka jingieid jong ki ïa ka pisa,” ong u Bah Pala.
Da kaba kynnoh ruh ba ka don ka jingïakynad kaba nang jur ha ka longïing jong ka NPP, u Bah Pala u la ong, “Ka jingïakynad ka long kaba jur bha hapoh ka NPP namar ba ki nongwan thymmai ki dei ki “riewshlur” bad ki paidbah, kiba trei shitom ban pynlong ïa ki ban jop ki kylla long nod.”
Nalorkata, u la kam pat ba bun ki nongïalam ka NPP kin sa ïasoh bad ka party shen bha.
“Mynta ka sngi, nga la thoh da ka shithi ban pan jingbit namar bun ki NPP ki kwah wan rung sha ka Congress. Kiba bun na ki snar NPP kin wan sha ka Congress. Khamtam ha ka thain Garo Hills bun kiba la wan sha ngi bad mynta nga dang pan jingbit na Delhi”, u la ong.
U la kynnoh ruh, “Kiba la trei na ka bynta ka party naduh ka por u PA Sangma ki la shah beh noh na ka party hadien ka jingwan jong ki briew ba thymmai, ki nongkhaïi na ka Congress, ki shim ïa ka shuki ba shakhmat.”
Halor ka jingkylli, u Bah Pala u la ong ba kadei hok ïa u Myntri Rangbah barim ka Jylla Dr. Mukul Sangma ban ong ba ka jingrai jong ka NPP ban khring ïa ki MLA jong kiwei pat ki seng sain pyrthei ka dei namar ba kam shaniah ïa la ki jong ki MLA.
Haba kren pat halor ka ishu Nongïalam ka Liang Pyrshah, une u heh Congress u la ong ba u la dep kyrpad ïa u MLA ka Mylliem u bah Ronnie V Lyngdoh uba bat mynta ïa katei ka shuki ba un ïakynduh ïa u Lamphang namar ba ka party ka don mynta sa tang uwei u MLA ha Iing Dorbar.
Halor ka rai ban ïakhun ïa kane ka jingleit pynïasoh NPP ki MLA, une u heh Congress u la ong ba ka party ka la phah ïa baroh sha Delhi na ka bynta ban pynkhreh ïa kane ka mukotduma.
“Ngi la phah lut sha ki kumta kin sa shimkhia. Kin sa eksamin bad kin sa ujor da ka mukotduma. Ki la phah ïa nga ïa ka draft bad ka long kaba biang”, u la bynrap.