Nga la thait ïa ki seng saiñhima na kata ka daw nga aireng kum u kyrtong shimet: George Lyngdoh

Nongpoh, Rymphang, 02: U MLA barim ka Umroi Constituency Bah George B. Lyngdoh u ban ïakhun kum u kyrtong Indepdent ïa ka elekshon sha ka Iingdorbar Thawaiñ jong ka Khasi Hills Autonomous District Council (KHADC) ka ban sa long mynta u bnai u la pynpaw ba u la thait ïa ki seng saiñhima bad ïa ki nongïalam jong ki.
“Namarba teng teng ha ka jingïamir jingmut tang ar lai ngut ki nongïalam ha kaba kut jot ka seng, jot ki nongbud, ka pynlehraiñ ruh ïa ngi ban leit hakhmat jong ki paidbah ba shiphang da kumne shiphang da kumtai ha ka jingkylla jong ki nongïalam bad ki rai ki jong ki bad dei na kata ka daw ha kane ka kynti ngan mih beit kum u kyrtong shimet ban lait na kita kiei kiei baroh,” ong u Bah George haba kren sha ki lad pathai khubor hadien ba ladep thep kyteng ha ka taiew baladep.
U la ong ruh ba ka jingthep kyrteng jong u ban aireng ha ka elekshon MDC ka dei da ka jingangnud ban shakri ïa ki paidbah jong ka Umroi Constituency kumba ki paidbah ka Umroi ki la ithuh bha ïa u ha ka jingshakri kaba san snem kum u MLA.
“Ha kane ka kynti nga kyrpad ïa ki paidbah ba kin ailad ïa nga ba un mihkhmat ïa ka Umroi Constituency sha District Council,” la kyrpad u Bah George ïa ki paidbah ka Umroi.
U la ong ruh ba ka thong hi ba u la rai ban mih shakhmat ka long ban ïakhun ïa ki jingeh kiba bun khamtam kiba ïadei bad ki aiñ ki kanun naduh ki por ba la seng ïa ka District Council, kum ka Trading License, ka Labour License namarba ki ktah ïa ka ïohkam ïohjam khamtam ha kaba ïadei bad ka Umroi Constituency.
“Ha kaba ïadei bad ka riti bat khyndew ha ka them Ri Bhoi, kyrpang eh ïa ka Umroi constituency kaba ngi la ïohi ba ka la ktah ïa kiba bun ki longiing longsem kiba sah tang ki kynthei khynnah ban ïoh wat tang shi nongrim ïing ruh ka long kaba eh shisha na ka bynta ki spah, ki hajar tylli ki longing. Ngi ïohi pat ba hapoh ka jaidbynriew ka jong ngi, ki don ki shnong ki thaw kiba shim ïa ka jingkitkhlieh na ka bynta la ki jong ki khun ki kti kiba mih ïing mih sem ha kaba ka shnong ka shim ïa ka jingkitkhlieh na ka bynta ban ai shi nongrim ïing ïa la ki jong ki khun,” u la ong.
“Ngi donkam ban ïatai hapdeng ka jaidbynriew jong ngi ruh ki don ki kynhun, ki nongsynshar shnong kiba lah ban ai ïa kata ka bynta ïa ki khun ki hajar jong ka shnong, ki don patde ha Ri-Bhoi da ki spah tylli ki longïing kiba ïakhun ban ïoh wat tang shi nongrim, namar ka jingban jong ka jingduk” la ong u Bah George da kaba bynrap mynta ka District Council ka la pynmih shibun ki aiñ thymmai hynrei kumno ban pyntreikam ïa ki la donkam ban pyrkhat bha ïoh shu bun sa tang ki aiñ khlem da pyntreikam kumba la long ha kipor bala dep.
U Bah George u la ong ruh ba kawei ka jingangnud jong u ka long ban buh noh ïa ka skul ban ai jinghikai na ka bynta ki Rangbah Shnong, ki Seng Longkmie, ki Seng Samla ba kin ïadon bynta ha ka synshar shnong khamtam eh ban peit ïa ka riti dustur bad ban peit ruh ba ka imlang sahlang kan long kaba im ryngkat ka akor ka burom kaba u Khasi naduh hyndai u la buh.