Shillong, Nailur 20 : U Nongïalam ka AITC uba dei ruh u Myntri Rangbah ba rim ka jylla u Dr Mukul Sangma mynta ka Sngi Balang u la ong ba u la leh ïa ka kamram da kaba u la pyntip ïa u Myntri Rangbah ba u ïashon dur lang bad u Nongkhaïi drok ba shyrkhei tam na Mizoram bad mynta ka shong ha u kaei kaba u dei ban leh ïa kaba donkam.
ïa kane ula kren sha ki lad pathai khubor hadien ba u Lamphang u la weng noh ïa ka jingkren jong u Dr Mukul hynnin ka sngi hapoh ïing dorbar ha kaba u la kynnoh ba u Myntri Rangbah u Conrad K Sangma u don ka jingïadei bad utei u nongkhaïi drok u Henry Lalremsanga namar ma u (Conrad,) ka kurim jongu ki ïashon dur lang bad u ( Henry) ha kawei ka prokram baheh ha nongbah Delhi. Une u briew u dei uba la shah kem ha ka 23 tarik Iaiong 2013 ha kaba ïadei bad ka jingïoh kurup ïa ki kuli pseudoephedrine kiba la niew beaiñ bad long kum ki drok ba shongdor haduh 6 klur tyngka.
U Dr Mukul u la ong “ Ha ka jingshisha u dei ban sngewthuh ïa kane ka jingpyntip jong nga shaphang u Henry namar lehse um ïohi ïa ka khubor kaba la pynmih ha utei u snem 2013 ruh.
“Balei ban sngew bitar, namar nga tip shai ba kiba bun ki tip bha shaphang u Henry bad kin mynjur ruh bad nga la ïoh jingtip hynnin hi ka sngi hadien ba nga la wanrah ïa ka mat hapoh ïing dorbar ba une u briew u wan u leit bha sha kane ka jylla. Kumta nga la pyndep ïa ka kamram. Kadei ka kamram jongu ban pyntreikam ïa ka jingstad jongu” ong u Dr Mukul.
U la ong shuh shuh ba u sngew lyngngoh haduh katta katta kumno ki ïalam bakla bad ïada pynban ïa u da kaba kynnoh kylla ïa u (Dr Mukul) ha ka jingshisha ki la dei ban tohkit bniah na u Myntri Rangbah kein.
“ Nga khlem ong ba u Conrad u ïadon kti hynrei nga la ong ba une u briew ba ïashon dur lang bad ïashong lang ha kajuh ka miej ha kawei na ki prokram ha Delhi u dei u nongkhaïi drok bad kane ka pynpaw ba u don ka jingïaithuh ithaw bha bad u. Nga la ong ba ka jingïathuh ithaw kaba jan bha bad na kata ka daw mynta ka sngi nga la kren biang hapoh ka ïing dorbar ba ka kamram jongnga ka long ban pyntip ïa u bad mynta ka la dei ka por jong ki paidbah ban leh ïa kaba donkam” ong biang u Dr Mukul
U la ong hapoh ka ïing dorbar hynnin ka sngi u la maham bad ai jingmut ïa u myntri rangbah ban peit kumno ban pynïajngai na une u briew bad u la dep kren ruh ba um dei ban sngew ei ei namar kane ka dei tang ka jingmana namar ïa kane ka jingïashon dur lang la pynmih ha ki kot khubor ha Delhi.
Halor ka jingong jong u Myntri Rangbah ba u Dr Mukul u dei ban wad bniah bha shaphang u Henry, u Dr Mukul u la ong “ Kata ka dei ka kam jong nga bad ma u (CM) ruh u dei ban wad jingtip bniah. U dei ban phah bud dien bha ban tip kaei kaba la jia ïa une u briew bad la u dang don jingïadei ne em bad kino kino ki briew namar um leh tang marwei hynrei u ïadon kti lang bad kiwei kiwei ki briew wat kiba na Delhi ruh. Ban tip la u dang ïadon kti ne em ka shong ha u myntri rangbah namar u don ha ka bor kaba u lah ban leh ei ei lada u sngew donkam, u lah ban shu thoh sha ki bor sha Delhi ban wad bniah shaphang une u briew khnang ba un tip ïa ki jingshisha baroh”.
