Shillong, Lber 23: Wat hadien ba ka jylla ka la ïoh ban kyntiew sa katto katne ki takma ha ka sngi khadduh jong ka lympung 3rd North East Games ha Nagaland hynrei pynban ka Meghalaya ka la hiar shaduh ka kyrdan ba hynñiew ha ka miej khur takma ki nongïalehkai.
Haduh kaba kut jong kane ka lympung kaba la long ha Nagaland ka jylla Meghalaya ka la wanphai ryngkat bad 2 tylli ki takma ksiar, 12 tylli rupa bad 41 tylli ki takma rnong, bad haba kheiñ kyllumlang ka jylla ka la ïoh ban khur 55 tylli ki takma, bad wan ba san haba kheiñ tang na ka jingïoh khur takma hynrei namar ka jingïoh ban khur tang 2 tylli ki takma ksiar ka Meghalaya ka la hiar ban tam shakhmat tang ïa ka jylla Tripura.
Haba phai sha ki jingïalehkai hynnin ka Sngi Saitjaiñ, ka sngi ban sa khylliap artad ïa kane ka lympung, ka jylla ka la bynnud bad hap ban hun takma rupa naki thei ïalehkai basketball hadien ba ki la shah rem noh ha ka Sikkim ha ka final, kata da tang 61 – 60 basket.
Na ki nongïalehkai Athletics ka jylla ka la ïoh ban khur ar tylli ki takma, da kaba khur takma rupa ha ka women’s cross country ba la mihkhmat da ka Bandasharai Marwein, Ibanriakor Lyngkhoi, Claire Jones Jala Kharbhih bad ka Barisha Khymdeit. Katba ha ka kynhun ki shynrang ba la mihkhmat da u Kresstarjune Pathaw, Knerlang Phawa, Iohborlang Nongspung bad u Dabit Dkhar ki la ïoh ban khur Rupa.
Ka Meghalaya ka la ïoh ruh ban khur kawei ka takma rnong ha ka Lawn tennis, lyngba ki shijur ba kynthup ïa u Wankhraw Wahlang Nongrum bad u Enrick Suchiang.
Ka jylla ka la ïoh ruh ban khur ar tylli ki takma rupa bad kawei ka rnong ha ka archery. Ka kynhun ki kynthei (recurve women’s team) ki la wan kyrdan ba ar, ba la mihkhmat da ka Navidisha Kapoor, Daphishisha Jamu, Damandashisha Pasi bad ka Andrica Nongsiej. Kawei pat ka Rupa la khur da ki shijur ba kynthup ïa u Mukesh Tamang bad ka Navidisha.
Nangta u Mukesh u la jop takma rnong ruh ha ka recurve men’s team ba kynthuplang ïa u Larilang Lyngdoh, Devraj Mohapatra bad u Amebalaker Wanniang.
Khadduh, ka jylla ka la ïoh ban khur kawei ka takma rupa na ka belt wrestling lyngba u Kyrshanbor Romeo Songthiang (men’s 60kg) bad ar tylli ki takma rnong na ka Lorenza Songthiang bad ka Sany Khyriemmujat (women’s 60kg).
Ki jingïalehkai kiba ka jylla kam shym la ïoh ban khur takma ha kane ka kynti ki long ha ka badminton bad ha ka football, ka volleyball, nangta ka sepak takraw ka jingïalehkai kaba ka jylla kam shym la ïashimbynta.
Kumba ka paw, haba nujor ha ka lympung ba ladep ka Meghalaya ka la duna palat ha ka jingïoh khur takma mynta u snem. Ha ka North East Games 2022 kaba long ha nongbah Shillong, ka Meghalaya ka la wan kyrdan ba saw ryngkat bad 36 tylli ki takma ksiar, 35 tylli rupa bad 78 tylli ki takma rnong.
Kawei na ki daw ka lah ban long ka jingkylla ha katto katne ki jingïalehkai. Ka Karate ka la shah weng noh mynta u snem, ka jingïalehkai kaba ka Meghalaya ka la ïoh ban khur shibun ki takma ha u snem 2022. Nangta ki jingïalehkai kum ka judo, shooting, swimming, cycling, golf bad ka weightlifting. Ha jaka jong kine la pynrung da ka volleyball, belt wrestling, pencak silat bad ka sepak takraw.
