Nang kiew kiba thep Vote ha ki Lai Constituency ka West Khasi Hills

Nongstoiñ, K’lyngkot 13 : Ka Ophis u District Election Officer West Khasi Hills District, mynta ka sngi ka la pynmih ïa ka Draft Electoral Roll na ka bynta ka elekshon KHADC 2025. Kane ka thup kyrteng ka kynthup ïa baroh lai tylli ki konstitwensi jong kane ka District kaba kynthup ïa ka 27-DCC Nongstoiñ, 28 Rambrai Jyrngam DCC bad 29 Mawshynrut DCC.
Ïa kane ka jingïalang la pynlong ha Deputy Commissioner’s Conference Hall Nongstoiñ, hapoh ka jingpynïaid jong u Bah Garod L.S.N. Dykes, IAS, Ophisar Elekshon ha ka District, ha ka jingdon ryngkatlang kiwei pat ki ophisar ka district kiba kynthup ïa u Bah V.C. Swer, MCS (ADC & RO), u Bah E. Lyngdoh MCS (AC & ARO), u Bah C.P. Mawkhon MCS (ADC), Bah R. Kharkongor MCS (AC, BDO) Mawshynrut, Bah T.Diengngan BDO Nongstoiñ, Kong R.Kharshandi (AERO) Rambrai, u Bah R Kharmujai ASE bad ki nongmihkhmat jong ki seng saiñ pyrthei bapher bapher.
U DEO u la aiti paidbah ïa ka thup kyrteng nongthep vote sha ki nongmihkhmat jong ki seng saiñ pyrthei. Baroh ki nongthep vote kiba lah ban thep vote ki long 131,787 ngut, ryngkat ka jingkheiñ bniah katkum ki konstitwensi, 27-Nongstoiñ DCC ki long 45,961 ngut 28-Rambrai Jyrngam DCC ki long 42,058 ngut 29-Mawshynrut DCC ki long 43,768 ngut
Ka distrik ka don haduh 146 tylli ki jaka thep vote, ha kaba 29 tylli la ithuh ba ki long kiba lah ban shah ktah namar ki daw kum ka jingïakhun ha ka saiñ hima sima, ki jingïakhih hapdeng ki jylla, bad ka jingjngai jong ki jaka.
Ka tarik ba khatduh na ka bynta ki jingdawa bad jingpyrshah ka long ha ka 22 tarik u Kyllalyngkot 2025, Ka jingpynkut ïa ki jingdawa bad jingpyrshah ka long ha ka 24 tarik u Kyllalyngkot 2025, Ka jingpynmih ïa ka thup nongthep vote ba khatduh ha ka 27 tarik u Kyllalyngkot 2025.
U District Election Officer u kyntu ïa baroh kiba don bynta bad ki nongthep vote ba kin bishar bniah ïa ki kyrteng jong ki bad pynthikna ba baroh kin ïoh ban kyntup ha kane ka thup jingthoh ne ka drat electoral roll.