Tang na ka daw bym don surok kali, hap kit daka met ïa kiba pang ba shitom

Jowai, K’lyngkot 13: Tang na ka daw bym pat don ïaka surok kali ki paidbah nongshong shnong kila hap ban kit daka met ïa kiba pang ba shitom ban pynpoi ïaki sha ki jaka sumar kiba marjan lyngba u surok khlaw jong ka shnong.
Kane ka dei ka shnong Madanrwai kaba hap hapoh ka Elaka Raliang Laskeiñ Block, West Jaiñtia Hills District bad kane ka shnong ka dang hap hapoh ka 4-Mookaiaw Constituency. La ïathuh haduh mynta ka shnong kam pat don satia ïa ka surok ban pynsuk ïa ki paidbah haka leit ka wan.
Katkum ki Video bala phah da ki nongshong shnong na ka katei ka thaiñ, la ïathuh naduh ki por mynshwa wat haduh mynta kila hap pyndonkam da ki siej bad ka jaiñ ban pynthiah ïa kiba pang ba shitom khnang ban ïoh pynpoi ïa ki sha ki jaka sumar.
Na ka por sha ka por ki nongïalam jong ka shnong Madanrwai kila dep ban pynpaw ïa kane ka jingeh kaba ki ïakynduh haka leit ka wan bad kumjuh haka kit ka bah jong ki sha ki nongmihkhmat jong ka thain bad sha ki bor sorkar ba dei peit, namar ïa ka surok khlaw ban poi sha shnong la ieh shrah da ki phew phew snem. Kumta kila buh ka jingkyrpad na ki bor sorkar ba kin shimkhia ïa kane ka jingdonkam jong ka shnong ban ïoh noh ïa u surok ba biang.
La ïathuh ba hashwa ban don ka elekshon ki kyrtong ki ju khlei ïaka jubanlak ban pynshna noh ïaka surok haka shnong Madanrwai hynrei tang shu kut ka elekshon ym don shuh wat tang uwei ruh uba leit mih sha ka shnong ban sngew ban sngap ïaka jingeh jong ki paidbah, la kynthoh kitei ki nongshong shnong.