Ka Election Commission jong ka Ri ka shah ïanga ban ïakhun kum u kyrtong shimet : Bah Lambor

Shillong, K’Lyngkot 13 : U MDC ka Nongkrem, Bah Lambor Malngiang ha ka sngi Nyngkong u la ong lada wat ka Election Commission jong ka Ri ka shah ba un ïakhun ïa kane ka elekshon MDC kum u kyrtong shimet, kumta ki paidbah kim dei satia ban sngap ïa ki briew kiba thmu ban ïalam bakla ïa u paidbah ha kane ka elekshon ba sa long shen.
U Bah Lambor u la ong ruh ba ha kane ka elekshon MDC kaba sa long shen ha ka 21tarik Rymphang mynta u snem, ki paidbah kin jied ïa ki nongmihkhmat da kaba bishar ïa u kyrtong ym dei eh ïa ka party.
“Ha Nongkrem ruh ki paidbah ki donkam ïa ka jingieid bad ka jingshaniah ym da ka bor pisa,” u la bynrap shuh shuh.
Une u nongmihkhmat uba la bat teng kum u MLA ka thaiñ u la ong ba ka jingpynkhreh ïa ka elekshon kam dei satia tang shisie ha ka san snem hynrei kadei ka kam kaba u ïai bteng man ka sngi bad u paidbah.
Nalorkata, u ïathuh ruh ba hadien ba u lashah rem noh ha ka elekshon MLA 2023 na ka UDP, ki la shim lang da kawei ka rai bad ki nongkyrshan ban ïakhun noh kum u kyrtong shimet ha kane ka elekshon MDC.
Ha kajuh ka por, u Bah Lambor u la ong ruh ba um shim sting ïano ïano ruh ha kane ka elekshon hynrei u shaniah beit ha ka bor jong u paidbah ban ai ïa ka rai kaba paka tam eh ha ka sngi thep vote.