Shillong, K’lyngkot : U Bah Michael Kharsyntiew uba la pan tiket na ka Bharatiya Janata Party (BJP) ban ïakhun na North Shillong Constituency ha ka elekshon jong ka Iingdorbar Thawaiñ ka ban sa long mynta u snem u la nang ïoh bor shuh shuh da ka jingpynïasoh jong u nongkyrshan baradbah jong ka Seng Congress u Babulal Sharma uba long ruh u nongkhaii bad u President jong ka Police Bazar Unit.
Ïa ka kynhun ba lai spah ngut ba la ïalam da u Babulal Sharma la pdiang sngewbha sha ka BJP da u Bah Michael Kharsyntiew ha ka jingïalang kaba la long ha ka lah Sngi u Blei.
Ha kane ka jingïalang, la sakhi lang da ka National Executive Member jong ka BJP ka Kong Sumietra Laloo, ka nongïalam ka Asomi Borah, ka State President jong ka Mahila ka Kong Euneescy Unis Khyriem, u MDC barim jong ka Jaïaw Constituency u Bah Martamlin Pyrbot, u General Secretary jong ka BJYM East Khasi Hills District u Bah Dapkupar Nongrum, u General Secretary Shillong City Convenor ka Mann ki Baat u Ashok Sharma, u Bah Moses Bareh, u Prosenjit Mandal, u Dolan Chakrabarty, u Naren Sharma ka Dropti Devi bad kiwei kiwei.
U Bah Michael Kharsyntiew haba kren ha ka jingïalang u la ong ba ka jingwan pynïasoh jong u Babulal bad ki nongbud jong u kan pynthikna ba un ïoh ïa ka tiket na ka BJP ban aireng ha ka elekshon sha ka Ingdorbar Thawaiñ ka ban sa long shen.
U la kyntu ruh ïa u Babulal bad ïa ki nongbud jong u ban ai ka kti ka mon, ka kti ka diang na ka bynta ban trei shitom khnang ba un dup lah ban pynurlong ïa ka jingangnud jong ki paidbah nongshong shnong ha North Shillong Constituency.
