Shillong, K’lyngkot : Ka Executive Committee ka Dorbar Shnong Lumkshaid, Shillong, ka la shong pyrkhat kam ha ka 24.01.2023 halor ka jinglong jingman kaba ïadei bad ka ilekshon sha ka ïingdorbar thaw aiñ ka ban long ha ka 27 tarik u Rymphang 2023.
Ka jingïalang ka pynkynmaw ruh ba ha ka ilekshon kaba la dep, ki la don ki jingjia ki bym sngewtyn nad bad kiba pynthohbria ym tang ïa ka shnong hynrei ïa ka constituency hi baroh kawei.
Kumta kum kawei na ki shnong kaba hap hapoh ka 18th West Shillong Consti tuency, ka Committee ka la shim khia ban ïakren halor ka shongsuk shongsaiñ hapoh shnong pohthaw kumjuh hapoh ka constit uency hi baroh kawei.
Hadien ba la ïakren sani bha halor kane ka phang la sngewdei ban kyntu bad kyrpad ïa ki para nongshong shnong ba kin sngewbha ban long kiba adkar ha ka ktien ka thylliej bad ban kyntu kynpham ruh ïa la ki jong ki khun samla ba kin kiar na ki kam sniew bad ban long kiba jai jai la ki don ha kano kano ka saiñ party saiñ pyrthei.
Kumta ruh khnang ban pynneh ïa ka shongsuk shongsaiñ hapoh ka shnong ka thaw, ka Dorbar Shnong ka la pynmih ïa ka jingmaham ba yn ym shah ban ïalum ne ïa ïeng bun ngut ha ki surok shnong ne ki kyndong kynshrot hadien ka 10 baje mynmiet.
La kyntu ruh ba ki kyrtong kiba thmu / kwah ban pynlong ïa ki jingïalang hapoh shnong ki dei ban da ïoh jingbit na ki bor shnong bad kumjuh na ki bor pynïaid district.
Kino kino ki kyrtong kiba pynlong ïa ka jingïalang ha ki surok shnong ki dei ban pynkut noh hapoh ka 9 baje mynmiet.Ki nongkren kim dei ban kren ne kynthoh ïano ïano kiba ktah ïa ka longbriew ka manbriew ne kaba wanrah ka jingïapait ïapra hapdeng ki nongs hong shnong ne ki para marjan marpa.
La kyntu ruh ïa ki kyrtong ba kin buh la ki jong ki volunteer kiba don ka jingkitkhlieh na ka bynta ban peit ïa ka suk ka saiñ khnang ba ka jingpynlong ïa ki jingïalang kan long kaba ïaid beit ïaid ryntih.Kane ka long katkum u kyrwoh lyngba u Bah DS Marbaniang Rangbah Shnong bad Bah K.Kharkrang, Secretary Dorbar Shnong Lumkshaid.
