Ha u Rymphang ka kiew pyneh rngiew ha Lum Sohpet Bneng

0

Shillong, K’lyngkot, 31: Ka Lum Sohpetbeng Committee, Seng Khasi Kmie kan pynlong ïa ka ‘Kiew Pyneh Rngiew’ ba shi sien shi snem jong ka Seng Khasi sha kliar jong u Lum Sohpetbneng, ha ka 5 tarik, u bnai Rymphang 2023.
Ha katei ka sngi yn sdang da ka nguh ka dem na Khyrdop Lum Sohpetbneng ha ka por 8 baje mynstep bad ha ka por 10 baje kan don ka nguh ka dem halor ka Duwan jong une u lum ba kyntang.
Na ka liang ka Lum Sohpetbneng Komiti, Seng Khasi Kmie, ka pyntip ba ki Kali yn shah ïa ki ba kin kiew tad haduh ka por 12 baje mynsngi bad kiba kwah ban leit phai noh sha la ki iing ki sem, yn shah ban hiar naduh ka por 2 baje nohphai sngi.
Haba ïadei bad kane ka ka jingkiew pyneh rngiew kaba mynta ka snem, u Vice Chairman ka Lum Spohpetbeng Committee ka Seng Khasi Kmie u Rgh Païa B. Synrem u la wan shakhmat ban pathai ïa ka khubor sha baroh ki parakur para kha najan bad na jngai ïa ki jingpynkhreh pynkhrum ïa ka sngi kiew pyneh rngiew kaba shi sien shi snem.
U Rgh Païa u pynpaw ba la khmih lyntiba mynta hi ka snem ba kam don kano kano ka jingkhang bad ka jingwan ban kiew pyneh rngiew ka long kaba laitluid, da kumta la khmih lynti ïa ka jingwan ban ïashim bynta da kiba bun.
Haba ïadei bad ka surok, u Rgh Païa u ïathuh ba ka long kaba la biang bha naduh naba sdang na khyrdop haduh kliar lum, haba phai sha ka um, u ai khublei kyrpang ïa Chief Engineer ka tnat PHE kong ba da lade hi I la leit ban jurip ïa ka tyllong um bad ha kliar u lum khnang ba ka jingpynkhreh kan long kaba biang.
Ka komiti ka kyntu ïa ki paidbah nongwan ba kin ïa snohkti lang da kaba bud ryntih ïa ki rukom pynïaid ïa ki kali bad kyntu ruh ïa ki paidbah ba kin sngewbha ban kiar ha kaba sliew ne thang ding khnang ban lait na ka jingpluh kum ka jingburom ban pynneh pynsah bad ai jingïada ïa ki sawdong sawkun jong ka mei mariang.
Kumjuh ruh ban ri kyndong ïa ka khuid ka suba bad ka jingkyntang jong une u lum jong ka jaidbynriew ka komiti ka kyrpad ruh ïa baroh ki nongwan ba kin sngewbha ban burom ïa ka Mei Mariang bad da ka jingkit khlieh shi met shi met, ïa ki jhep ne ki jakhlia kiba mih na ki jingpyndonkam jong ki nongwanshim bynta ha ka kiew pyneh rngiew ba phin sngewbha ban ïa bud ryntih lang da kaba lum thup bad bret pat ïa ki ha ki jaka theh jhep ne jaboh kiba dei rukom.

Leave A Reply

Your email address will not be published.