Naduh 28 tarik K’Lyngkot la leit ïakynduh u Danggo ïa u Himanta, khyrwit kylla u president ka NPYF

Shillong, K’Lyngkot 31: U President ka National People’s Youth Front (NPYF), u Bah Kitborlang Nongrem u la kyntait war ïa ka jingkynnoh ba u don bynta ban ïasylla na ka bynta ban pynrem ïa u kyrtong ka NPP na Ranikor constituency, u Martin M Danggo. Hynrei u la ïathuh ba u Danggo ryngkat bad ka kynhun ka jong u naduh ka 28 tarik mynta u bnai ki la leit ban ïakynduh ïa u Myntri Rangbah ka Assam uba dei u nongïalam ka BJP ha Assam.“Kane ka mut ba u Danggo u la dep shim lypa ïa ka rai bad kaei kaba la jia hynnin ka sngi ka long ban shu pyni ba ki paidbah ki kwah ïa u ban leit sha ka BJP” u la ong.“Kane ka jingpynshai jong u nongïalam ki samla ka seng NPP ka long hadien ba la mih ka jingshah kynnoh ha ka nongkyrshan jong u Martin Danggo hynnin ka sngi, ha kaba da ki spah ngut ki nongkyrshan ki la rai ban mih noh na ka NPP da kaba dawa ruh ïa u kyrtong uba dei u MLA bad Lamphang barim, u Martin Danggo ba un mih noh na ka NPP ban ïakhun noh ïa ka election na ka Bharatiya Janata Party (BJP)”.”Kane kadei ka rukom leh jong u Danggo watla um pynpaw shai ba u la mih na ka party, hynrei la thikna ba u la dep rai bad kan nym don shuh ka jingphaidien jongu”, la ong u Bah Nongrem da kaba bynrap ba ka jingleh ka jongu ka long ba u bret beit ïa ka jingeh sha ki paidbah, bad kum u nongialam u Danggo u dei ban ïalam katba ma u pat u phah ialam pynban ha ki paidbah.
Ha kaba ïadei bad ka jingkynnoh ka Kong Pelcy Snaitang ba ka la don ka jingïasylla ban pynrem ïa u Danggo, na ka liang u president ka NPYF u la pynshai ba katei ka jingïatai kadei ha ka rynsan ‘WhatsAap Group’, bad kadei halor ka mat ba ki ong ïa ka NPP ba kadei ka seng Garo, bad kane ka jingïatai kadei ha ka 5 tarik Nailar (Aug) 2022, ha kaba u la bynrap ruh ba kane ka jingkynnoh kadei tang namar ba kim don shuh da kano kano ka daw ban kynnoh ban mih na ka NPP.“Kine ki nongïalam kiba la mih noh ki tip shai ba ngan nym mih na ka NPP, bad ka jingtieng ka jongki ka long namar lada ka NPP ka pynïeng kyrtong mynta, kan dei ka jingma ïa u Bah Danggo”, la ong u Bah Nongrem, da kaba pynkynmaw ruh ïa ka by-election MDC kaba la dep jong u snem 2019.Haba kylli kumno ka party ka pyrkhat ïa u kyrtong ka NPP hadien ba la mih noh u Danggo, u la ong ba kam long ka por kaba biang ban kren mynta, hynrei un leit sha Ranikor ban lum ïa ka jingïalang ba kyrkieh ban shim lang ïa ka rai da ki paidbah la ka party kan pynïeng kyrtong ne em ha kane ka election.
Haba kylli shuh shuh, u Bah Nongrem u la kubur ba ka jingpait jong ka NPP ha Ranikor kan ktah beit, hynrei u la bynrap pat ba ki paidbah kiba la poi sha ka jingïalang jong u Danggo ki leit da ka jingmut ba kadei ka jingïalang jong ka NPP, kaba pyni ba kiba bun ki paidbah kim tip ba ka jingïalang kadei ka ban mih noh na ka NPP.
U Bah Kitboklang Nongrem ula ïathuh ba ka Party kan sa khot noh mardor ïa ka General Meeting jong ka party ha Rangthong ha ka 2 tarik Rymphang ban ïakren halor kane ka kam.
Haba kren sha ki lad pathai khubor, u Bah Kitboklang u la ong “Ka jingïalang ka long ban thaw thymmai ïa ka party bad ban rai halor u kyrtong. Ha kine ki sngi ban wan, u Danggo un sa ai ïa ka shithi iehnohkam hynrei ngin ym lah ban ap haduh ba un iehnoh na ka party namar ngi hap ban leh kloi ïa kane ka kam”.
U la ong ruh ba kane ka jingleh jong u Danggo ka long ka jingshet kylla biang ïa ka NPP. “Ha ka por ba u thmu ïakhun ïa ka elekshon MDC shiteng samoi hadien ka jingkhlad noh u Bah N Marwein, ha kato ka por u Danggo ula leit phai sha ka Congress. Hadien ka elekshon u la wan phai bïang sha ka NPP. Ngim poi pyrkhat ba kum kane ka jingjia kan wan jia biang bad un shet kylla ïa ngi sa shisien” u la ong.
U Bah Kitboklang u la kam ruh ba ki nongïalam ka NPP ha ka Jylla ki la pyrshang ban pynsngewthuh ïa u Danggo ba un neh bad ka party hynrei u la kyntait ban sngap ïa ka jingkyrpad jong ki bad khatduh ula rai ban kynthih sha kawei pat ka party.
U Bah Kitbok ula kyntait ruh ïa ka jingkynnoh jong ka nongïalam u Danggo, ka Kong Pelcy Snaitang ba ki nongïalam ka party ki la kyrshan ïa u MLA ka United Democratic Party (UDP) u Bah Pius Marwein namar ba kim kwah ba une u Lamphang barim ka Iingdorbar Thaw Aiñ un jop na Ranikor.
“Kam don satia ka jingshisha halor ka jingkynnoh ka Kong Pelcy ba nga bad ka kynhun jong nga, ngi la pyrshang ban ialap pyrshah ïa u Danggo ha kane ka elekshon ban wan” u la ong.
Haba kylli la u long uba kloi ban ïakhun ïa ka elekshon na Ranikor, u Bah Kitbok ula ong ba kane ka shong ha ki nongïalam ka party bad ki nongkyrshan hynrei na ka liang ka jong u, um lah satia ban ong eiei namar ka party kam dei ka nongkynti shimet jong u.
“Ngi don shibun ngut ki nongïalam ha ka kynhun jong nga bad khatduh ngin sa shim ïa ka rai kat kum ka jingai jingmut na ki Nongïalam jong ki Polling Station Committee bapher bapher” u la bynrap.
U Bah Kitbok u la kubur ruh ba kane ka jingshet kylla u Danggo khlem artatien kan don ka jingktah ïa ka party ha Ranikor Constituency.