Nalor ka pule kot, ki khynnah ki donkam ka jinghikai ban ïakhun ha ka jingim

Nongpoh, Naiwieng, 05: Da ka jingangnud ban pynmih ïa ki nongïalam naduh ka rta kaba dang rit, ba ki khynnah kin sngewthuh ïa ka dor jong ka jingim bad ki jingïaleh kiba ap kmang, khamtam ha ka rta kaba dang khynnah ka Meghalaya Institute of Governance (MIG) ka la pynkut noh ïa ka prokram ai jinghikai ba kyrpang, ba la tip kum ka ‘Building young leaders by empowering adolescence boys and girls with transformational life skills’ ba la shim bynta da kumba 624 ngut ki khynnah skul na kylleng ki skul ha Ri-Bhoi.
Kane ka prokram ka la ïarap ïa ki khynnah skul ban ïoh ïa ki jingtip kiba kham ïar na kaba ki ïoh ha ka jinghikai ba man ka sngi ha skul, kum ki jingtip ban ïarap ha ka jinglong briew man la ka sngi bad ki phang bapher bapher kiba la ai jinghikai ïa ki khynnah ki kynthup kumno ba kin long ki nongïalam ban long shlur ha ka jingim, ban nang ban jied ïa ki paralok bad kiar na ka jingpyndonkam ïa ki rynsan Social Media kibym ai jingmyntoi bad kiwei kiwei ba la ai jinghikai da ki nonghikai ba tbit ba kum ki khynnah kin lah kumno ban ïeng halide ban ïakhun ïa ki jingeh jong ka jingim ba man ka sngi.
Ha kane ka jingpynkut ïa kane ka prokram ai jinghikai la ïashim bynta da u Bah Mayral Born Syiem, MLA jong ka Nongpoh Constituency, ka Rubby Das, District School Education Officer,Ri-Bhoi District u Aiban Swer, Director ka MIG, ka kong June H. Warbah, Project Coordinator ka MIG, lem bad ki nonghikai bad ki khynnah na ki skul bapher bapher.
Ha katei ka sngi la sam ruh ïa ki Certificate sha kumba 624 ngut ki khynnah skul kiba la pyndep ïa katei ka prokram shah hikai, da ka jingkyrmen ba katei ka prokram kan ai jingmyntoi bad kan long ruh ka khubor bad nuksa sha kiwei pat ki para khynnah ba ka jingstad ka jingshlur bad ka jingshemphang ka long kaba kongsan ha ka jingim ba man ka sngi.
Haba kren ha ka jingïalang, u Aiban Swer, Director ka MIG, u la ong ba ka thong jong kane ka prokram ka long ban ïarap ïa ki khynnah naduh ka rta ba dang rit ba kin lah ban tem ïa ki jingeh ha kane ka por ba shibun ki jingkylla ki don ha ka jingim jong ki khamtam ka dei ka por ba ki dang heh dang san bad khie samla.
U la ong ruh ba ka jinglong nongïalam ka ju kyntiew barabor sha ka jingjop, bad ka long kaba donkam ba ki samla ki ïoh ïa ka jinghikai kaba biang ban ïoh ïa ka jingsdang da kaba ai jingïaroh ruh ïa ki khynnah skul kiba la ïoh ka lad ban shim bynta ha katei ka prokram namar shibun kiwei pat ki kwah ban don bynta, hynrei namar ka jinglong jingman jong ki jaka ai jinghikai kim shym la ïohlad, hynrei u la kyntu ïa kitei ki khynnah skul ha katei ka sngi ban sam lem ïa ka khubor sha kiwei pat ba kiwei ruh kin ïoh ka nuksa bad ka jingmyntoi.
Haba kren kum u kongsan, u Bah Mayral Born Syiem u la ai mynsiem ïa ki khynnah halor ka jingdonkam ban tehlakam ïa ka jingim ba man ka sngi ha kane ka juk kaba mynta. “Ha kane ka pateng mynta, kam don ka jaka ïa kito kiba sahdien, phi dei ban pyrshang ban long kiba kham bha ha baroh bynta jong ka jingim, ka jingim ka long kaba eh, bad phi dei ban tip kumno ban ïakynduh ïa ki jingeh jong ka bad kine ki jinghikai halor ban nang pynïar ïa ka jingstad ha ka jingim ba man ka sngi ki long kiba donkam shibun na ka bynta jong phi,” la ong u Bah Mayral.
U la kyntu ruh ïa ki khynnah skul ha kane ka juk mynta ba kim dei ban ngop ha ki jingshah pynbiej ba bun jait, namar ki kam ba sniew ki jyllei bad sdang na ki paralok, ki mobile phone bad kum ki khynnah ki dei ban stad ban shim bad jied ïa kabab ha lada ki kwah ban longbriew man briew ha ka jingim, u la bynrap.