Nongstoiñ, Jymmang 19: Ka Seng Khasi Student Union Mawshynrut Circle ha ka sngi palei, ka la leit ban ai da ka jingthoh sha u Executive Engineer ka tnad MePCL West Khasi Hills Division Nongstoiñ, ban ujor halor ka jingthut khah khah ka bording ha ka thaiñ Mawshynrut, ka jingshim sting ki line men ïa ka kam, ka jingsniew jong ki post ding ilektrik bad ka jingkiew dor ka bai bording.
U samla Anslem Ryntong organizing secretary ka KSU Mawshynrut Circle, haba ïakren sha ki lad pathai khubor hadien ka jingwan ïakynduh ïa u Engineer, u la ong ba ka Seng ka la kyntu ïa u tei u ophisar ba un shimkhia lem ban peit halor kitei ka jingeh ba ki paidbah ka thaiñ ki ïakynduh.
Shuh shuh u la ong ruh ba jingthut jong ka bording, ka ju jia khah khah wat ha ki por ba ym don kano kano ka jingpynthut na ki bor jong ka mariang. Nalor kata ki post ding ilektrik ruh ki bun ba la pei bad bam sarang, kiba lah ban ap jingma ïa ki paidbah ha kaba ka lah ruh ban wanrah ïa ki jingjia ba sngewsih.
Ha kaba ïadei bad kitei ki mat jingdawa ka Seng, na ka liang jong utei u ophisar u la pynpaw ba ka tnad ka duna palat ïa ki nongtrei. Hynrei u la kular pat ba un sa shimkhia ïa kitei ki mat jingdawa ka Seng da kaba un sa phah ruh ïa ka jingthoh sha ki bor ba halor.
