Naduh u Nohprah yn ïoh dawai sboh ki nongrep ryngkat ka subsidy, risa ki hajar ngut ki paidbah

Shillong, Risaw 30 : Ka sorkar jylla naduh u Nohprah mynta u snem kan pyllait noh ïa ki dawai sboh (urea) na ka bynta ki nongrep ryngkat ka subsidy kaba mar shiteng dor khnang ba sa shisien pat kin ïoh ban pynheh biang ïa ka rep ka riang kaba la hiar arsut naduh ba pyntreikam ïa ka rukom rep khlem dawai.
Ïa kane la pynpbna da u Myntri Rangbah bad Symbud Myntri Rangbah ka jylla ha ka jingïalang pdiang burom ïa u Bah Kansing Lyngshiang sha ka NPP bad kum u kyrtong ka NPP na Mawkynrew constituency ha ka elekshon MLA kaban long ha u 2023.
“La kumno kumno ha ka taiew kaba nyngkong jong u bnai ba 12, ka dawai sboh ka la poi bad ka subsidy ka la treikam bad ïa kane ngi aiti ha ka Mecofed ban pyntreikam na ka bynta ba phin ïa ïoh ïa kane ka dawai,” ong u Symbud Myntri Rangbah, Bah Prestone Tynsong.
Haba bynrap lang, u Myntri Rangbah, Conrad K Sangma pat u la pynkynmaw ba dei u Bah Kansing ryngkat ka kynhun nongrep kiba la ïakhun kumno ban pynïoh biang ïa ka sboh dawai.
“Kumta ka sorkar ka la rai ba ngin bteng biang ïa ka subsidy ïa ka dawai sboh na ka bynta ka jingmyntoi ki nongrep khnang ba sa shisien pat kin lah ban pynkhie im biang ïa ka rep ka riang jong ki kumba long baroh shi katta,” u la ong
Katei ka jingpynbna jong u Myntri Rangbah bad Symbud Myntri Rangbah ka la pynlong ïa ki hajar ngut ki paidbah kiba poi sha katei ka jingïalang ban risa shaid da ka jingkmen.
Shwa ka jingkren jong ki, na ka liang u Bah Kansing u la kyrpad ïa kitei ki nongïalam ka jylla ba kin pynshai lang halor katei ka dawai sboh namar ka Mawkynrew kadei kaba khlaiñ bha ha ka rep ka riang bad kiba la ngat lang ha ka jingeh naduh ba la khang ïa kitei ki sboh dawai kumjuh ka subsidy.