Shillong, K’lyngkot 10: Ka tnad pule puthi jong ka jylla lyngba u Under Secretary ka tnad Education u la phah da ka shithi sha u Dy. Director jong ka Higher and Technical Education ban pyntip sha baroh ki Higher Secondary School bad College ba naduh mynta u snem, baroh ki samla pule kiba kwah ban bteng ïa ka jingpule ha ka Under Graduate Level bad Post Graduate Level kin hap ban ïaleh shuwa ïa ka eksam Common University Entrance Test (CUET).
Kane ka shithi na ka tnad pule puthi ka ong ba ha ka snem baladep ka Meghalaya ka la lait na ka jingpynlong ïa ka CUET na ka bynta ki College kiba la pynïasoh bad ka NEHU, hynrei mynta ka snem ka sorkar India kam shah shuh khlem da ïaleh ïa kane ka Eksam. Kumta ka kyntu ïa ki Principal jong ki Skul bad ki College ba kin pyntip lypa ïa ki Khynnah Skul bad ki Samla pule bad kumjuh ruh ïa ki kmie ki kpa baroh khnang ba kin tip ban pynkhreh lypa na ka bynta kane.
Hynrei na ka liang kiba bun ki la buh ka jingkylli la ka sorkar ka la pynbiang ne em ïa ki Centre ba ki samla kin shong ban thoh ïa kine ki eksam lane la ki Samla pule jong ka jylla baroh kin ïoh ban thih ïa kane ka eksam ha jylla lajong ne ki kin don kiba hap ban leit thoh shabar jong ka jylla.
Ha ka snem baladep, ha Shillong la don tang kawei ka Centre ba thoh eksam, hynrei kito kiba kwah ban shim admission sha ki College kiba khlem ïasoh bad ka NEHU hynrei kiba pynïasoh bad ki Central University ki hap ban leit thoh shabar jylla kum sha Guwahati bad don ruh kiba ngat ban thoh eksam shaduh Rajasthan.
Ka Meghalaya man la snem ka don da ki hajar ngut ki samla pule kiba kwah ban shim admission ha ki Under Graduate bad Post Graduate Course.
