Shillong, K’Lyngkot, 10: Uwei u nongtih dewiong u la ïap hadien ba kawei ka krem dewiong be-aiñ ka la khyllem ha East Jaiñtia Hills District ha ka 9 tarik mynta u bnai.
Ka tyllong khubor ha ka sngi Balang ka ïathuh ba ka tnat Pulit ka la bthah ïa u Officer in-charge jong ka Khliehriat Police Station ban pynlong ïa ka jingtohkit bad ban phah ïa ka kaiphod kaba bniah halor kane ka jingjia lashai ka sngi Palei.
Ïa ka hukum la pynmih hadien ba la ïoh jingtip halor kane ka jingjia kaba ïathuh ba uwei u nongtih dewiong ba la ithuh kyrteng kum u Riew Siangshai uba la 40 snem ka rta, uba sah ha ka shnong Moolang, u la ïap hapoh kane ka krem dewiong katba u dang tih ïa u marpohkhyndew bad shah tep im hapoh ka krem..
Ka thymmei khubor ka ïathuh ba katkum ka jingïoh jingtip jong ki Pulit ka ïathuh ba kane ka krem dewiong ka dei kaba la kynnoh ba la long trai da uwei u briew uba kyrteng u Kwen Shylla, uba dei u Waheh Shnong jong ka shnong Moolang.
Dang ha u bnai baladep, ka Ingbishar Meghalaya High Court ka la hukum ban pynkynriah kam ïa u Superintendent of Police (SP) jong ka East Jaiñtia Hills u Jagpal Singh Dhanoa halor ka jingbym lah jong u ban tehlakam ïa ka jingtih dewiong bad ka jingshalan be-aiñ ïa u dewiong hapoh ka District.
Ha ka 13 tarik Nohprah, 2018, haduh 15 ngut ki nongtih dewiong kiba donkti ban tih be-aiñ ïa u dewiong ha East Jaiñtia Hills ki la sahkut hapoh ka krem hadien ba ka um ka la ïohrung shapoh ka krem na ka jingshlei jong ka wah Lytein kaba don hajan.
