Shillong, K’lyngkot 10: Ka Kynhun jong ka Voice of the People Party Narpuh Circle mynta ka sngi ki la leit ïakynduh ïa u Deputy Commissioner ka East Jaiñtia Hills District ban leit ai ia ka jingujor ha u halor ka jingbym lerkam ki Border Security Force (BSF) ban pahara ia ki jaka khappud haduh ba ki khar Bangladesh ki lah ioh ban rung shapoh u pud u sam ka Ri India bad ban pom bad pyniap dusmon ia uwei u riew Rangbah naka shnong Umkiang uba kyrteng u Bah Sylvanus Dhar ba ju sin u Chiang Dhar, katba uwei pat u paralok jong u, u Rahul Pohtmi u la lait lait im na ka tyrsim jong ki Khar Bangladesh ha ka 6 tarik mynta u bnai.
Ha kane ka jingthoh ka Seng ka la pynpaw shai ba kadei ka jingbym shimkhia ki shioai BSF ba sa jia kane ka jingshah pyniap namar ba ka jia tang ha ka jaka kaba jngai tang kumba 500 Meter na ka Lamasaki BSF Camp.
“Kadei beit ka jingkitkhlieh ki BSF kiba pahara ha khappud jong ka India bad Bangladesh ki bym shimkhia ne pahara bha ba kine ki khar Bangladesh ki ioh wan rung shaduh u pud jong ka ri India”, la ong kane ka jingthoh.
Na ka liang ka Seng ka la dawa ruh ba ka sorkar kadei ban ai jingïarap ïa ka ïing ka sem u Bah Sylnavus uba la iehnoh shadien ïa I lok iba don hapdeng ka jingshitom bad ïa ki 3 ngut ki khun, namar ba kine ki wan na ka longing kaba duk bad ka ïa ka ïing ba ki shong ruh ki shu shongwai.
Ka VPP ka la dawa ruh na u DC ban weng iaki khyrdop pahara jong ki shipai BSF kiba don ha surok NH Sonapur bad Ratacherra namar kine kim dei ki khyrdop ai jingiada hynrei kidei pynban ki khyrdop ban shoh beiñ bad lehbeiñ ïaki riew paidbah.
Ka President ka VPP Narpuh Circle ha kaba kane ka jingjia ka jia, ka Kong Deiwi Tongper ka la buh jingkylli ruh ka jingpyndik ki BSF ïaki riew paidbah haki surok National Highway katba ki ailad pat ïaki khar Bangladesh ban rung katba mon bad ban pynïap katba mom iaki nong India.
U Bah Damewanhi Rymbai, Organiser ka VPP East Jaiñtia Hills District uba la leit lang ban ïakynduh ïa u DC u la pynpaw ka jingsngewkhia halor ka jingshah pynïap beiñ kaba na ka por sha ka por jong ki riew lui lui ha khappud bad ka Bangladesh. U la ong ba ka sorkar kadei ban tohkit halor kane ka jingjia kaba la jia ia u Bah Sylvanus bad ia u Rahul namar ka la buh ia ki paidbah ha ka jingsyier kaba khraw. U la ong ba na ka liang ka Seng kan leit iakynduh ruh ia ki bor sorkar halor kane.
Naka liang jong u DC u lah pynpaw iaka jingsngewkhia bad ruh u la kular ban khot jingïalang ïaki BSF haki sngi ban wan ban tohkit halor ka jingdkoh treikam jong ki.
