Shillong, Nailur 25 : Ka Research and Development Committee jong ka Khasi Hills Autonomous District Council ha ka sngi Nyngkong ka la shong ïa ka jingïalang kaba nyngkong eh na ka bynta ban pynshlur ha kaban pynlong ïa ka jingwad bniah ïa ka riti dustur tynrai u Khasi bad la buh por ban pyndep ïa ka jingwad bniah hapoh ka saw bnai.
U Chairman jong kane ka Committee u Bah Carness Sohshang uba long ruh u Executive Member (EM) uba khmih ïa ka pule puthi, ula ong, ba ha kane ka jingïalang kaba nyngkong jong ka committee kaba kynthup ïa ki 7 ngut ki dkhot, kala shim ïa ka rai ban pynmih ïa ka jingpynbna paidbah ban khot ban wer ïa ki Scholar ne ki Researcher ban pynlong ïa ka jingwad bniah halor ki phang kiba kongsan.
“Ka jingwad bniah kan long halor ka niam ka rukom u Khasi, ka jingkyntiew kurim, ka ktien ka thylliej, ka jingmih jong ki Kur bad ka Jait, ka kolshor, ka rukom synshar tynrai ki khlieh nongsynshar, ka jinghiar dor ka akor ka burom ha kane ka pateng kaba mynta, ka jingngeit beij, ka jingbat ïa ka khyndew ka shyiap, ki ïew tynrai kiba shisien shi taïew, ki tiar tem tiar put tynrai kynthup ïa ka jingrwai tynrai u Khasi, ki jaka kiba don ïa ka histori bad ki mawbynna, ka jingïoh kaba hiar pateng, ki kam thaiñ kti, ka rukom bam rukom dih ka jaidbynriew, ka rukom ai jingsumar tynrai, ka histori shaphang ka jingim bad ka jingnoh synniang u Rev JJM Nichols Roys bam kwai ha dwar u Blei, ki Syiem kiba la ïaleh ban pynïoh ïa ka jinglaitluid ïa ka jaidbynriew” la ong u Bah Carness.
Ula ong, ba la rai ba yn pyrshang ban pyndep ïa kitei ki jingwad bniah hapoh 4 bnai bad ka jingsiew ïa ka bai wad bniah ka long T.1 Lak haduh ban da dep bad yn ai ruh T.10,000 kum ka Contimngency.
U Chairman ula ong, ba ka Committee kan sa pynmih ïa ka jingpynbna paidbah ha ki lad pathai khubor ban khot ban wer ïa ki nongleh Research bad yn sa khmih bniah ïa kine ki jingtyrwa jong ki nongleh Reasearch ïa ki mat kaba ki mut ban wad bniah.
Ula ong ba na ka bynta kane ka kam, ka KHADC kala mang T.50 Lak ban pynlut ha ka jingleh Research halor kitei ki mat bapher.
U Dkhot ka Committee u Dr DRL Nonglait ula ong, ka KHADC kala shim ïa kane ka sienjam, kadei namar ba ki nongwad bniah ki ju wan kylli na ka Council ïa ki kaiphod bapher bapher bad ka Council ka don tang malu mala eh ïa ki jingtip.
Ula ong, ba kane ka jingduna ki jingtip kam dei tang haka Council hynrei wat ha ka State Central Library, ki University bad ki jingthoh kiba ïadei bad ka riti ka dustur, ka niam ka rukom ka jaidbynriew, ki histori jong ki hima bad ka kolshor kadei kaba la thoh da ki nongsynshar kiba mynshwa kiba hap ban shaniah ha ki kaiphod jong ki nongwei.
“Kane ka jingleh ka Council mynta ka long, ba ngi hap ban wad hi na ka bynta la ka jong ka jaidbynriew bad kane kadei tang ka jingsdang bad ka Council kala sdang shwa ïa ka jingwad bniah kiba rit bad nangne kan sa nang ïai bteng ka jingwad bniah” ong u Dr Nonglait.
