Rai ka tnad Social Welfare bad Education ban ïatrei lang ban ïoh jingmyntoi ki khynnah na ka MECDM
Shillong, Nailur 25: U Myntri ka tnat Social Welfare u bah Paul Lyngdoh mynta ka Lah Sngi U Blei , ula pyntip ba ka sorkar Jylla ka thmu ban ai jingmyntoi haduh 1 lak ngut ki khynnah lyngba ka Meghalaya Early Childhood Development Mission (MECDM).
U Bah Paul ula pyntip ïa kane hadien ka jingïalang hapdeng ka tnat Social Welfare bad ka tnat Pule Puthi ha ka jingdon lang u Myntri ka tnat Pule Puthi Rakkam A Sangma, u Nongaibuit ka tnad Pule Puthi bah H.M Shangpliang lem bad ki heh ophisar jong kine artylli ki tnat treikam sorkar.
Haba kren sha ki lad pathai khubor u bah Paul ula ïathuh ba ka thong jong kane ka jingïalang ka dei ban wad ïa ki lad lynti kumno ban pyntyllun shakhmat ïa ka MECDM na ka bynta ka jingmyntoi ki khynnah da ka jingïatreilang ka tnad Social Welfare bad ka tnat Pule Puthi jongka jylla.
U bah Paul ula ïathuh ba ha ka jingïalang, u Principal Secretary ka tnat Social Welfare lyngba ka kor ai jingbatai (Presentation) ula pynsngewthuh kumno ban pynïaid shakhmat bad kumno ban pynbeit ïa ki kynrum kynram ha kaba ïadei bad ki jyrwit jyrwat kiba long kum ki maw jynthut ha ka jingpyntreikam ïa ka MECDM.
“Haka jingïalang la rai ban don da ka “Draft Guidelines ka ban long ka kyndon lane ka lynti ba kine ki artylli ki tnat kin ïatreilang ha ka ban pyntyllun ïa ka MECDM na ka bynta ka jingmyntoi ki khynnah jong ka jylla bad la buh thong ruh ba lyngba kane ki don palat 1 lak ngut ki khynnah ki ban ioh jingmyntoi” ong u bah Paul.
U bah Paul ula kubur ruh ba ki jingeh ha kaba ïadei bad ka jingpyntreikam ïa ka MECDM bad kawei ka dei ruh namar haduh 1500 tylli ki shnong kim pat don ïa ki Anganwadi Centre bad ha kane ka jingïathir bad ka tnat Pule Puthi la shim rai ban pyndonkam shwa da ki kamra jong ki School kiba thylli ha ki shnong ki bym pat don ïa ki Aganwadi Centre.
Ula ïathuh ba hapoh 1 snem, ka tnat Social Welfare kan sa pyrshang ban thaw thymmai haduh 600 tylli ki Aganwadi Centre bad na ka liang ka tnat ka don ruh ka thong ban ai jinghikai ïa ki khynnah hapoh kine ki Centre.
“Ngi la bthah ïa baroh 2 tylli ki tnat ban wanrah da ka thong lane ka Roadmap kumno ban pynïaid shakhmat ban pyntreikam ïa ka MECDM bad hadien kane ka tnat kan thoh sha u Myntri Rangbah ka jylla ha kaba ïadei bad ka jingdonkam pisa ban pyntreikam noh ïa ka MECDM” ula ong.