Mih ka huri hura ha ka shnong khappud ha Barapathar tang na ka daw ka top um JJM ba tei ka sorkar Meghalaya

Nongpoh, Nailur 25: Tang na ka daw ka jingtei ïa kawei ka top um jong ka skhim JJM ha ka shnong Barapthar ba hap ha khappud ka Assam bad Meghalaya, ki jinghuri hura ki la mih hapdeng ki paidbah ka Shnong khappud na Meghalaya bad ki paidbah na ka shnong khappud ka Assam.
Kane ka huri huri ka la mih ka dei hadien ba la sdang ban tei ïa katei ka Top Um jong ka skhim JJM ha kawei ka jaka ba la ai sngewbha da kawei ka Longkmie na ka shnong Barapathar, hynrei ki huri hura ki la mih na ka daw ka jingdon ki 2 ngut ki briew na Assam kiba kam ba katei ka jaka ka hap sha Assam katba ka dei pat ka jaka ba hap ha ka Shnong Barapathar hapoh ka jylla Meghalaya.
Ki kynrum ki kynram ki la mih ruh naduh ka Sngi Saitjaiñ hadien ba ki ar ngut ki biew na Assam ba kynthup ïa u Tutu Mazumdar bad u Nirul Islam ki la pyrshah ban tei ïa katei ka top um da kaba kam ba ka hap sha ka jylla Assam bad ki paidbah nongshong shnong ka Barapathar ki la pyrshah jur ba katkum ki kot ki sla katei ka jaka ka hap ha ka jylla Meghalaya bad ba la ai sngewbha ruh da Kong Juki Marwet, kaba dei ka nongshong shnong ka Barapathar.
Kumba la ioh lum jingtip da u Nongthoh Khubor halor katei ka jingjia, ka la don ruh ka thma ktien hapdeng ki briew kiba na Assam bad na Meghalaya ha katei ka shnong khappud bad ka daw hi ka long halor ka jingshna ka sorkar Meghalaya ïa katei ka top um lyngba ka skhim JJM kaba thmu ban pynbiang umbam umdih ïa ki paidbah nongshong shnong ka Barapathar, hynrei ïa katei ka jaka ba la shna ïa ka top um bad ba la ai sngewbha da ka ka Kong Juki Marwet la pyrshah da ki nongshong shnong ka Assam kiba la kam ba ka dei sha ka jylla Assam.
Ka thma ktien ka la mih ruh mynta ka sngi ha katei ka jaka kumba la ioh lum jingtip, ka dei hadien ba u Syiem ka Raid Marwet u la leit ban jurip ïa katei ka jaka kaba dei hadien ba la mih ka huri hura na ka jingshan ïa katei ka top um ba katei ka jaka ka hap ha ka jylla Meghalaya, hynrei ki paidbah na Assam ki la pyrshah jur haduh ba la hap ban poi ki bor pulit na Assam bad na Meghalaya ban khangland ba kan nym dei ban mih kano kano ka huri hura kaba ktah ïa ka shongsuk shongsaiñ ki paidbah, ong ka khubor ba la ioh lum.
Shuh shuh, la ioh lum jingtip ruh ba ïa kene ka jingïakynad hapdeng ki briew kiba na Assam bad na Meghalaya ha katei ka shnong khappud la lah ban pynthynda da ka jingïakynduh lang ki bor pulit na Assam bad na Ri Bhoi, kiba la ïa kren ban nym ailad ban mih kano kano ka huri hura bad ba la khanglad ruh ïa ki paidbah ban ïa lum ha katei ka jaka ha kaba ki la shim rai ruh ban phah kaiphod sha ki Deputy Commissioner ba kin ïa kren halor kane ka kynrum kynram khamtam ban ïa pynbeit halor katei ka jingshna ïa katei ka top umbam umdih ba la pyntreikam lyngba ka skhim JJM, ong ka tyllong khubor ba la ioh lum.