Shillong, Risaw 01: Ka Expert Committee halor ka State Reservation Policy (SRP) kan pynlong ïa ka jingbishar paidbah ha Shillong, Tura bad Williamnagar naduh ka 3 tarik mynta u bnai Risaw.
Ïa kane la ïathuh lyngba ka jingpynbna ba la pynmih da u Chairman jong ka Expert Committee halor ka State Reservation Policy ha ka jylla jong ka Meghalaya ha kaba ka jingpynbna ka la wan na u Justice Mool Chand Garg (Retd) sha ki nongïalam bapher bapher ha u bnai ba la dep.
La ong ba ka committee kan pynlong ïa ka jingbishar paidbah ha kaba kito kiba don ïa ki jingai jingmut, kiba donkam ïa ki jingïasyllok, ki jingkynthoh kin wan ban pynpaw ha kine ki sngi kaba long naduh ka 3, 4 bad 5 tarik mynta u bnai ha Shillong bad ha Tura bad Williamnagar kan long ha ka 21 haduh 25 tarik mynta u bnai.
Ha ka jingpynbna la pyntip ba ïa ka jingbishar paidbah ha Shillong kan long ha State Convention Centre naduh ka 9 baje mynstep haduh ka 1 baje nohphai sngi bad naduh ka por 2 baje nohphai sngi haduh ka por 6 baje janmied.
Ïa ki jingtip kiba bniah na ka bynta ka jingbishar paidbah ki ban long ha Tura bad Williamnagar yn sa pynbna ïa ki tarik kham hadien.
Ka committee ka la kyrpad ruh ïa kito kiba don ïa ki jingai jingmut kiba la dep ban aiti dangshen sha ka committee ba kin wan ïashim bynta ha kane ka jingbishar paidbah ka ban long ha ka 3 tarik mynta u bnai naduh ka por 9 baje mynstep bad kidei ruh ban wanrah ïa ki kot ki sla ban kyrshan ïa ki jingkyrpad jong ki.
