Shillong, Risaw 1 : U Myntri Sorkar ba khmih ïa ka tnad Labour bad kiwei de ki tnad jong ka Sorkar jylla Meghalaya u Bah Shakliar Warjri, haba ai jingkren haka “1st Northeast Skill Development and Entrepreneurship Conclave 2024”, kaba la long mynta ka sngi 1 tarik u Risaw 2024, ula pynsngew sha u myntri khynnah jong ka sorkar pdeng uba khmih ïa ka tnad Ministry of Skill Development and Entrepreneurship bad ka tnad Ministry of Education, u Jayant Chaudhary, ba ka jingeh ha ka jylla Meghalaya ka dei namar ba kiba bun ki ITI ki don beit ha ki District Headquarter, katba ki samla kiba kwah ban wan shah pyntbit ïa ki sap treikam jongki, ki sah sha ki shnong kiba kham jngai na kine ki jaka ai jinghikai, ha kaba bun naki kim kot bor ban kyrshan da lade lane na ki bahaïing ban pynlut sa ka bai kali haka leit ka wan, kumta bun na ki, ki kynran dien noh.
Kumta ha kane ka sngi u Bah Shakliar Warjri ula kyrpad na ka Ministry of Skill Development and Entrepreneurship, ba haka scheme Northeast Skill Development and Entrepreneurship, dei ruh ban bsut lang ïa ka kyndon ban shah ïa ka sorkar jylla ban pyndonkam na kane ka pisa ban buh ruh bad ki jaka sah ne kita ki Hostel ha ki ITI kiba don ha kylleng ka jylla, khnang ba ki samla kiba wan pyntbit ha kane ki jaka kiba sah kham sha jngai na ki District Headquarter bad khamtam kito kiba wan na ki longïing kiba duna bha ka ïoh ka kot kin myntoi shisha.
Sa kawei pat ka mat kaba u Bah Shakliar Warjri ula pynsngew sha u myntri khynnah jong ka sorkar pdeng u Jayant Chaudhary, ka long ba nalor ka jingpyntbit bad pynjanai ïa ka sap treikam jong ki samla hala ki sap treikam ba ki don bad kwah ban pynleit jingmut, ula ban jur halor kumno pat ban aikam aijam ïaki, khamtam ïa kito kiba wan na ki longïing ba duk ki bym lah ban kyrshan na la ïing ban seng kam lajong.
Kumta u Bah Shakliar Warjri ula kyntuh ïa ka sorkar pdeng lynba u Jayant Chaudhary ban phai khmat ruh sha kane ka bynta ban thaw ïa ki lad ai kam ai jam ïa ki samla, hadien ba ki la dep pyntbit ha ki kam bapher bapher.
