Shillong, Risaw, 01: Ki nonghikai jong ki skul SSA kiba don hapoh ka shatri jong ka All Meghalaya SSA School Teachers Association (AMSSASTA) ha ka sngi Baar ki la sdang ïa ka jingïakhih ba khlem pud sngi ban dawa ïa ka Sorkar Meghalaya Democratic Alliance (MDA) ba la ïalam da ka National Peoples Party (NPP) ba kan kyntiew ïa ka tulop kaba kot shispah na ka shi spah.
U President jong ka Association u Babu Peter Thyrniang ha ka jingïakren bad ki lad pathai khubor u la ïathuh ba kane ka jingïakhih ba khlem pud sngi jong ki nonghikai skul SSA ha madan Malki, Shillong ka long hadien ba ka jingaipor ïa ka tnat Pule Puthi jong ka Sorkar Jylla ka la kut hynnin ka Lah Sngi u Blei.
“Ngi la rai skhem ba ngin ym pynkut ïa kane ka jingïakhih ba khlem pud sngi lada ngim pat ïoh ïa u soh jong ka jingjop ha kaba ka Sorkar ka dei ban pynkiew ïa ka tulop jong ngi ban da ka jingthoh ba ka la leh eiei na ka bynta jong ngi, hynrei lada ka Sorkar ka shu ïakren ha ka miej khlem ka jingthoh ïa kata ngin ym pdiang daleilei ruh em,” ong u Babu Thyrniang.
Haba kylli, u la ong ba ki nonghikai skul SSA kin shong beit ha madan Malki tad haduh ba kan da khot ïakren.
U la ong, ‘ka mat kaba ngi dawa ïa ka sorkar ka long beit tang kawei, kata, ban kyntiew ïa ka tulop shipah na ka shispah,”
U la ong shuh shuh ba ka jingdawa ban kyntiew ïa ka tulop ka long ba ki nonghikai skul SSA ki ïoh beit thik tang ïa ka tulop bad kim ïoh satia ïa kino kino ki jingsiew.
Kane ka jingdawa jong ka AMSSASTA ban kyntiew ïa ka tulop ka long hadien phra snem namar ka jingkiewdor jong ki marbam mardih katkum ka jingïaid jong ka por.
