Shillong, ïaïong 22: Ka jingkyntiap klob jong ki District lane ka Inter-district transfer jong u snem 2025 na ka bynta ki nongïalehkai phutbol kiba hap hapoh ka Meghalaya Football Association kan sdang naduh ka 28 tarik ïaïong 2025, la pyntip u Bah Sunesh Syiem, uba dei General Secretary jong ka MFA.
ïa ki transfer phom kiba lai syrtap lah ban ïoh na ophis treikam jong ka MFA kaba don ha JN Stadium, Polo, Shillong da kaba siew T.100 shi set naduh ka 28 tarik u ïaïong haduh ka 10 tarik u Jymmang naduh ka por 3 baje nohphai sngi haduh 5 baje janmiet man la ka sngi, lait noh ka Sngi U Blei.
ïa ki phom ba rong pink dei ban pynpoi sha ophis jong ka MFA, nangta ka phom rong lieh yn bat da ka District Association katba ïa phom rong saw yn bat da ka klob. Yn nym pdiang ïa ki phom khlem ki dur kiba ïadei jong u nongïalehkai.
Ban pyndep ïa ka jingkyntiap klob (transfer), ki nongïalehkai ki dei ban soi hi dalade ïa ka register ha ophis jong ka MFA bad dei ban siew ïa ka bai kynriah klob (transfer fee) kaba T.1,000. ïa kane lah ban pyndep hapdeng ka 12 haduh 17 tarik Jymmang naduh ka por 3 baje nohphai sngi haduh 5 baje janmiet. Shisien ba la soi, ka jingkyntiap klob ka la dep bad ka MFA kan pynphriang ïa ka thup ba khatduh jong ki nongïalehkai kiba la kynriah klob sha baroh ki synjuk district ba ïasoh bad ka MFA.
