Khliehriat, Nailur, 10: Ka Federation of Khasi Jaiñtia and Garo Peoples (FKJGP) Khliehriat Circle ba la lamkhmat da u President u Bah Michal Chyrmang ryngkat ka jingsynran lang jong u Secretary u Bah E.Sutnga ha ka sngi Baar ki la leit ban ïakynduh ïa u Executive Engineer jong ka Meghalaya Power Distribution Corporation Limited (MePDCL) Moowakhu u Bah M. L Pohshna ban pynsngew ïa ka jingkiew shaba palat ka bai thang bording.
Ha ka jingïakren, u Bah Pohshna u la kular ban sa leit ai jingpynshai sha ki paidbah nongshong shnong bad u la kyrpad ruh ïa ki Waheh Shnong ban ai ka jingïatreilang halor kane ka mat khnang ba ki paidbah kin lait na kaba sah umdum.
Ha kaba ïadei bad kane, ka FKJGP ka la ai jingmut ba ka ophis ka dei ban ai jingpynshai ïa baroh ki nongthang bording elektrik kumno ban kheiñ ïa ka bai bording khnang ba u paidbah un ym tharai sniew shuh ïa ka ophis, la ong u kyrwoh ba la phah da u President ka seng u Bah Michal Chyrmang.
Ka seng ka la ai jingmut ba baroh kiba aplai thymmai (new Connection) ka MePDCL Moowakhu ka dei ban pynsngew ïa ki nong thang bording kumno ban kheiñ ïa ka bai bording katkum ka jingpyndonkam jong ki khnang ba u paidbah un ym tharai sniew ïa ki bor ba dei peit jong ka ophis.
Ka ophis ka dei ban buh ïa kawei ka Help Desk khnang ba ki paidbah kin suk ban wad ïa ki jingtip haba donkam.
Ka Office ka dei ban pynsngewthuh ïa ki paitbah kumno ban siew online ïa ka bai bording, khnang ba ka por jong ki paidbah kan ym sepei ban leit siew ïa ka bai thang bording shaduh Moowakhu khamtam ïa ki paidbah kiba sah sha ki shnong kiba jngai bad kan pynsuk ruh wat ïa ki nongtrei jong ka ophis.
Ka Office ka dei ban pynsngewthuh ba ki paidbah ki lah ban siew ïa ka bai thang bording hapoh 15 sngi naduh ba la ïoh ïa ka slip bai thang bording na ki nongtrei jong ka MePDCL.
