Jowai, Nailur, 10: Ka RC. Eve Secondary School Mihmyntdu kaba dei kawei na ki shlem ai jinghikai ïa kiba bun ki khynnah kiba wan na ka long ïing ba duna ka ïoh ka kot, ha kane ka 10 tarik Nailur kala pynlong ïa ka programme kaba kyrpang na ka bynta ki khynnah halor ka jingdonkam ka jingnang jingstad ne ka “World Literacy Day”.
Ïa ka jingïalang la pynïaid da ka Jessica Biam, Headteacher RC Eve Secondary School, Mihmyntdu ha kaba la donlang ruh ka kong D. Lathong, BMC-SSA kum ka kongsan, nalor ki dkhot ka School Managing Committee naduh u Father H. Lamare, Secretary SMC, Fedrick Sr. Pushpa Beck Headmaster, Sr. Shella, Principal Don Bosco School, Mihmyntdu bad kiwei de.
Ha kane ka sngi la pynsngew da ka Manchaki Laloo, Teacher In-charge OOSC Special Training Centre RC Eve Mihmyntdu ïa kane ka skul la seng naduh u snem 2013 hapoh ka jingpeit ka kong (L) Tina Lakiang. Ha une u snem da ka jingtrei shitom ki Volunteer jong kane ka Special Training Centre napdeng ki 70 ngut ki OOSC la lah ban ïalam lynti 12 ngut ki khynnah skul ban pynrung sha ki Normal School.
U Rev. Father H. Lamare ha ka jingkren ula kyntu kynpham ïa ki khynnah ban long kiba mihnot ha ka jingpule bad kiba don akor ka burom. Ka Baiahunlang Phawa Assistant Teacher RC Eve SS, kala kren halor ka phang kaba ong Promoting Multilingual Education-Literacy for Mutual Understanding & Peace.
Ka kongsan kong D. Lathong, BMC-SSA, Laskeiñ Block haba kren, kala ong ba ka long kaba sngwtynnad ban ïoh ban don bynta lang ha kum kane ka programe ryngkat ki khynnah jong kane ka skul bad kumjuh ka ai ka jingsngewnguh sha baroh kiba don bynta ban pynïaid ïa kane ka RC Eve Secondary School, Mihmyntdu.
Nalor ki jingkren la pynshongshit ïa kane ka sngi da ki jingshad jingrwai, jingïakop dro dur kaba la ïashim bynta da ki khynnah jong kane ka skul.
