Naba ïohi ba sdang bitar ki samla imat ka jingïakhih ki Gen Z sha jaka ri thor, ka la sdang pur lang sa shane sha jylla Meghalaya

K a jingïakhih jong ka KSU, ha ki khyndiat sngi ba ladep, ka la poi sha ka jing ïa thang kali, ka jinglun maw ïa ki kali bad ka jingpynjot pynjulor ïa ki kali kiba don da u number AS bad u number ML 01 bad ka jingjia, ka la long kaba sngewdiaw shibun bad kaba pyrshah ïa ka jingthmu jong katei ka seng ki samla pule, ban ïakhih halor ki mat kiba kongsan bad ym ban ïa shoh briew ne ban ïa thang kali.
Hynrei ka mat kaba kongsan hangne, ka long, ba kumno kine ki khun samla, lane ba ngi khot ïa ki, kum ki Gen Z, ba ki thap kput haduh katne katne ïa ki kali ML 01 bad kumjuh ïa ki kali AS bad kane ka dei ka mat, kaba ki heh jong ka sorkar MDA, kiba dei ïalade ki heh seng saiñ pyrthei, ba kin pyrkhat bha ïoh, ki la jah lynti ha ka jingïadei jong ki bad ki khun samla lane ki Gen Z, kumba ki ong.
Ki seng saiñ pyrthei, ba don ha kane ka sorkar MDA, lada dei ka NPP, UDP, BJP bad kiwei kin donkam kyrkieh ïa kine ki samla, ha kane ka elekshon MP, ka ban sa long shen, hynrei na kaei kaba paw ha kine ki sngi, la ïohi, kumba ki khun samla ki bitar jur bha ïa kane ka sorkar bad nangta ïa ki khar Assam bad dei na katei ka daw, ba ki pynjot pynjulor ïa ki kali kiba don ïa kitei ki number.
Ki jingshisha ban tih tyllong, ki long kiba donkam kyrkieh, lada dei ha ka jingïadei kam jong ka jylla bad ka Assam bad ïa kaba ki khun samla (lehse) kim i lah shah shuh bad nangta sa ha ki jingtreikam jong kane ka sorkar jylla ha ki prokram bapher bapher, kiba ki khun samla (lehse) kim sngew ïahab lane ki don ki daw kiba pyrshah bad kumta kane ka jingjia, ka dei ban don ar tylli ki mat ban pyrkhat ha kaba kawei ka liang, ka dei ban tehlakam ïa ki kam thombor ïa ka suk ka saiñ bad ha kawei pat ka liang, ka long, ba ka sorkar jylla, ka la jah lynti ha ka jingïadei bad ki khun samla.
Ki mat kiba ktah matïong bad kiba pynbitar ïa ki samla, kin lah ban dei na ka ïohkam ïohjam, ka jingleh tuh ha ki eksamin thungkam, kumba ka la paw ha DSC Jowai, ha ki khyndiat taïew ba la dep, nangta sa ka jingïohlad da kiba nabar ban trei ha ki ophis sorkar India, kumba ka long ha NEIGHRIMS bad ha kiwei de ki jaka, katba ïa ki kali AS, ka la paw shai bha, ba kitei ki kali, ki la poi lut sha ki kyndong kynshrot jong ka ri Khasi bad kaba la ktah ïa ka kamai kajih ki trai shnong bad ba la kurup lut da ki briew kiba nabar.
Ka jingjia, ka la dep jia bad ka la pyndiaw mynsiem bad pynjulor ïa bun ki jingdon jingem, hynrei ha kajuh ka por, ka dei ruh ïa kane ka sorkar MDA, ba kan dur ïap bha ïalade, ban pyrkhat ïa ki mat kiba ktah ïa ka bha ka miat jong ki khun samla bad ym tang ïa kito kiba poi leit thap kti sha ki prokram ot ribon jong ki heh ki haiñ.
Kumba la ïohi ba wat hapdeng kine ki jingjia kaba baroh baroh ki la pynpaw ba ki jingïakhih jong ka seng samla ki Khasi ka Khasi Students Union ka dei kaba shong nongrim hynrei kaei pat kaba ka sorkar ka leh ka long mar khongpong bad ki jingangnud jong ki.
Hadien ba la mih ki huri hura bajur ka sorkar ka hap ban shimkhia ban ïakren bad ka Assam ban ïoh pynlait noh ïa ki kali bad ki nongleit nongwan na baroh artylli ki jylla bad kaba la hap ban shim jingkitkhlieh ruh da ka sorkar Meghalaya ban puroi, ban ai bailutksan ïa ki kali na Assam kiba la shah pynjulor, katba ka sorkar Assam nalor ba ka ïohnong ka khlem kular eiei pat ban maramot ne ban siew bai lutksan na ka bynta ki kali tourist ka Meghalaya kiba la shah pynjulor ha ki nongïakhih kiba ha Guwahati ha kitei ki Sngi.
Ka jingkylli kaba mih ka long haduh lano ka sorkar Meghalaya kan dang ïai pyndem ha ka sorkar Assam. Kane ka jingleh ka sorkar jylla khlem pep kan sa nang pynbitar shuh shuh ïa ki nongshong shnong ka jylla naba ka pyni shai ba ïa ki briew la jong kam don jingkheiñ snep ne burom wat haba ki la poi ha ka bor synshar bad ïalam ïa ka sorkar da ka jingieid jong u paidbah nongshong shnong ka Jylla.