Shillong, Jymmang 15 : Ka jingïoh jong ki san tylli ki shnong ba kyrduh um bha ha Mawsynram constituency ban ïoh nyngkong ïa ka skim Jal Jeevan Mission na ka tnad PHE jong ka sorkar jylla kadei lyngba ka jingtuklar jong u MLA, ong u MLA ka thaiñ Bah HM Shangpliang ha ka sngi plie ïa ka skim pynpoi umbam umdih ha Phodstein.
Kitei ki san tylli ki shnong kiba ïoh ïa katei ka skim umbam ki kynthup ïa ka Phodstein Dongneng, Phodstein Dongrum, Umlynter Balat, Kandapara bad Pyndendakni. Ha kane ka sngi la ïadonlang u bah Olan Suin uba dei u Co-Chairman ka Meghalaya State Planning Board, Bah K Nongbsaw uba dei u SDO ka PHE Mawsynram Sub Division kaba hap ha Hills Division, ki Junior Engineer, ki riew rangbah, ki longkmie longkpa bad kiwei kiwei.
Ïa kitei ki san tylli ki projek umbam la tei ha ka jinglut kaba 75,56,000 tyngka kaba la sdang ban shna naduh ka 8 tarik Nailar 2021 bad la pyndep ha ka 31 tarik Jymmang na ka bynta ban sam sha ki 255 tylli ki longiing.
U MLA u la ïathuh ruh ba ka pisa jong ka skhim JJM ka wan na ka sorkar India kaba la phah kyllum sha ka sorkar jylla bad ka sorkar jylla ka la phiah sha ki district bapher bapher ban bate sha ki shnong ki thaw kiba donkam um kyrkieh.
“Ha ka District Level Committee kaba la khlieh da ka Deputy Commissioner, baroh ki MLA ki long dkhot bad ha kane ka committee nga la tyrwa ban jied shwa ïa kine ki san tylli ki shnong kata ka Phodstein Dongneng, Phodstein Dongrum, Umlynter Balat, Kandapara, Pyndendakni namar ki kyrduh um palat bad mynta ka sngi ka la urlong,” u la ong.
Na ka liang u Bah Suiñ u la kyntu ïa ki shnong ba kin pynneh pynsah ïa ki tyllong um khnang ban nym rngad na ka jingkylla ka suin bneng.
La pynphuh ïa katei ka sngi da ki prokram tynrai ba la pynkhreh kyrpang da ki nongshong shnong.
