ïatreilang ka CPF bad Truecaller na ka bynta ka jingshngaiñ ha ka jingpyndonkam ïa ka Internet

Shillong, Jymmang : Ka Truecaller kawei na ki rynsan ba heh tam ha ka pyrthei ha ka ba ïadei bad ki telephone nombor kata ban tip ïa ka kyrteng jong ita I briew iba don ïa uta u nombor ba phone bad ban khanglad na ka jingïoh pdiang ïa ki phone call na ki nombor bym kwah ban shim ïa ka phone ryngkat ka jingïatreilang bad ka seng treimon sngewbha ïa ka ba la tip kum ka Cyber Peace Foundation (CPF) ki la pyllait paidbah ha ka sien ba nyngkong ïa ka jingai jinghikai ïa kaba la tip kum ka “TrueCyberSafe” ka ba phaikhmat sha ka jingshngaiñ ha ka jingpyndonkam ïa ka Internet.
ïa kane ka prokram la pynlong ha Royal Global University ha Guwahati, Assam. Ka jingthmu jong kane ka jingpynsaphriang jingmut bad ka jingai jinghikai ban ïarap ïa ki briew kumno kin nang ban ïada ïa lade na ka jingshah shukor lyngba ka internet khnang ba ka jingpyndonkam ïa ka online kan long kaba shngaiñ.
Kane ka jingai jinghikai ka ba la sdang ha Assam kan long ha ki san tylli ki thaiñ ha kylleng ki bynta jong ka India khnang ban nang pynsaphriang shuh shuh ïa ka jingsngewthuh shaphang ki kyndon ba ki nong pyndonkam ïa ka internet kin sngewthuh kiei ki sienjam ba ki dei ban leh ban lait na ka jingshah shukor, ka jingïoh ïa ki khubor kai ne spam bad ka jingshah thok. Ha kane ka jingïalang la wan ban ïashim bynta da bun ngut ki riew pawnam.
Hadien ka jingpyllait paidbah ïa kane ka jinghikai la pynbud pat sa da ka jingïalang plie ba la pynlong da I Head-Capacity Building, CyberPeace Foundation, I Dr. Rakshit Tandon, hapoh ka jingïalap ïa ka #TrueCyberSafe. Ha kane ka jingïalang I la kren shaphang ki kam pyntriem ba la leh lyngba ki kor internet ïa kaba la tip kum ki cyber crimes bad kiei ki sienjam ba lah ban shim ban ïada na kum kine kiei kiei ïa kaba ki briew ki lah ban pyndonkam ha ka jingim jong ki ba man la ka sngi khnang ban long kiba shngaiñ ne Cyber Safe.
Ha kane ka jingïalang la kren ruh shaphang ki lad ki lynti ba ki lanot ki lah ban buh ka jingujor kynthup naduh ki rynsan buh jingujor ba kyrpang jong ka sorkar bad ha u CyberPeace WhatsApp helpline number.
U Global President bad nong seng jong ka CyberPeace Foundation u Major Vineet Kumar u la ong, “Lada ngi kynthup lang ïa ki jingtip baroh bad ki jingtbit treikam jong ka Truecaller, da shisha ngin lah ban wanrah ka jingkylla ha kaba ïadei bad ka jingsngew tuh ka ba lah ban wanrah ïa kiei kiei kiba biang tam bad ngi ngeit skhem ba ngin lah ban ai ïa ki nongïashim bynta da ki lynnong kiba ki lah ban bud khnang ban long kiba shngaiñ ha ka rynsan jong ka Cyberspace.