Na ki 1607 tylli ki ïingskul sorkar, palat 1391 ladep tei thymmai bad maramot

Shillong, Naitung 06 : Ka Sorkar Jylla ka la dep ban tei thymmai ne maramot pynbha haduh 1,391 tylli ki ïing skul na ki 1,607 tylli ki skul Government Lower Primary (LP) School kiba la shah jied hapoh ka Mission Education, watla ka jingtrei ha ki 216 tylli ki skul ba dang sah ka dang ïaid shakhmat.
Katkum ka kyrwoh ba la pyllait da ka sorkar jylla hynne ka sngi Nyngkong la ïathuh ba ïa kane ka prokram la pyntreikam ha baroh 12 tylli ki distrik jong ka jylla bad ka kynthup ïa ki skul sorkar naduh ka kyrdan Lower Primary haduh Higher Secondary.
La ïathuh ruh ba ka Sorkar ka la mang jan dap 1,000 klur na ka bynta ban tei thymmai, ban pynbha bad ban maramot ïa ki ïing skul, ha kaba ka tnad Pule Puthi ka dang bteng ban ïoh ïa mang pisa kaba heh tam ha ka mang tyngka jong ka jylla.
Hapoh ka Mission Education, ki kam maramot ki kynthup ïa ka jingpynthymai ïa ka tnum ïing, ki kynroh, ki mala, ki jingkhang, ki jingkhang ïit bad kiwei pat ki jingdonkam ba kongsan ha ki LP bad UP School. Katba ki jingtei thymmai bad kiba la pynheh la ai shuh ïa ki kamra klas, ki tiar ba pyndonkam kum ki jaka shong, ki library bad kumjuh ki jaka leit bar kiba paka.
Ka Sorkar ka la ong ba ïa kane ka jingpynbha la leh ha ki bynta bapher bapher.
La ïathuh ba ha ka Phase -1, ki la don haduh 198 tylli ki jingtei thymmai bad kiba la kyntiew kyrdan na ka bynta ki LP bad UP School. Ha ka Phase II, la pyndep 93 tylli na ki 100 tylli ki LP School thymmai. Ha ka Phase III, nalor ka jingmaramot ïa 1,391 tylli ki LP School, la pyndep ruh 62 tylli na ki 117 tylli ki jingtei LP School thymmai kiba la shimti. Katba ha ka Phase IV, kaba kynthup ïa 186 tylli ki jingtei thymmai ïa ki skul LP bad Secondary School , kaneka kam ka dang don ha ka bynta ban khot tender.
Haduh mynta, ki la don palat 2,000 tylli ki skul LP bad UP ba la shimti hapoh ka Mission Education, na kiba 1,744 tylli la dep pyndep bad 278 tylli ki dang ïaid shakhmat.
Ka kyrwoh ka kdew ruh ba ki Upper Primary School ruh ki la shah kynthup hapoh kane ka prokram, da kaba ai nuksa ïa ka Government UPS Mowkaiaw ha West Jaiñtia Hills bad ka Nogorpara Government UPS ha South West Garo Hills.
Ki heh ophisar ki la ong ba ka jingïaid shaphrang jong man la kawei pa kawei ka skul la buh jingthoh lyngba ki dur ba la geo-tag bad time-stamp ban pynthikna ïa ka jingïatrei kaba shai bad kaba lah ban peit bniah.
Da kaba kdew ba Meghalaya ka don jan 15,000 tylli ki elementary school, ka Sorkar ka la ong ba ka jingpynkylla ïa ka rukom treikam bad ka jingpynbha ïa ki skul ka dang ïaid ha ka rukom kaba la pynkhreh bha bad ha ki bynta bapher bapher, ym ban pyndep lut ha kajuh ka por.